“Ish-diktatori panamez Manuel Noriega, i cili spiunoi për CIA-n përpara se trafikimi i drogës dhe regjimi i tij brutal të nxisnin një pushtim amerikan në 1989-n, ka vdekur në moshën 83 vjeç.”
Kështu nis lajmi i agjencisë Reuters për ikjen nga kjo botë të Noriega-s, shtetarit panamez të përmendur dendur në pjesën e fundit të shekullit të shkuar.
Për presidentin aktual të Panamasë, Juan Carlos Varela, vdekja e Noriega-s shënon fundin e një kapitulli në historinë e vendit.
Agjencia e lajmeve Reuters thotë se Noriega, që e qeverisi Panamanë nga 1983-shi në 1989-n, u përfshi në spiunazh për CIA-n gjersa Shtetet e Bashkuara mësynë dhe e rrëzuan qeverinë e tij të korruptuar, duke i dhënë fund një karriere kriminale.
Gjatë presidencës së Reagan-it në vitet ’80 të një shekulli më parë, amerikanët do të mbështeteshin fort te Noriega teksa i kundërviheshin Kubës së Fidel Castro-s.
Në dhjetor të 1989-s, presidenti Bush urdhëroi një mësymje të marinës amerikane për të rrëzuar Noriega-n, i kthyer tashmë në një shqetësim për interesat amerikane në rajon.
Pjesa fundore e jetës së tij do të kalonte prapa hekurave në SHBA, Francë e Panama, i dënuar për një varg veprash penale. /tesheshi.com/
