Ministrja e Shëndetësisë Ogerta Manastrilliu tha në një dalje për mediat se situate COVID në Shqipëri është kritike por jo jashtë kontrollit, duke iu referuar për këtë edhe treguesve krahasimorë në shkallë rajoni.
“Situata është e kontrolluar. Rritja e qëndrueshme e rasteve karakterizon javën që mbyllim, por është një situatë kritike në raport me muajin e mëparshëm ku kemi dyfishim të rasteve. Nëse do të bënim një vlerësim sot, e dini që situata kërkon një analizë ditore. Por ato që e matin në mënyrë më analitike janë incidenca dyjavore si dhe rastet e humbjes së jetëve.
Shqipëria qëndron në një incidencë dyjavore në 101 raste në krahasim me rajonin që është 1154 banorë. Mjekët dhe infermierët kanë bërë më të mirën e tyre, por nuk ia kanë dalë 612 qytetarë dhe nëse do të bënim një vlerësim të fataliteteve për 1 mln banorë, vendi ynë qëndron në 26 humbje jete, ndërsa në rajon është 31.5”, tha Manastirlliu.
Ajo sqaroi dhe njëherë çështjen e testeve, duke thënë se është strategji e jo qëllim në vetëvete.
“Strategjia jonë e testimit është hartuar nga Komiteti i Ekspertëve, duke u këshilluar me OBSH-në, me struktura të tjera ndërkombëtare që vlerësojnë situatat epidemike, duke u mbështetur në kapacitetet tona testuese, Komiteti i Ekspertëve ka ndërtuar një strategji që ka rezultuar efektive. Ajo çfarë deri më tani është bërë është më e mira që ne mund të bënim”, u shpreh Manastirlliu, e cila, duke iu përgjigjur dhe çështjes së vonesës së rezultateve të testeve, solli shembullin britanik.
“Në faqen e ministrisë në Britani thuhet se rezultati i testit merret brenda 6 ditëve dhe vetëm më pas qytetarët duhet të marrin në telefon për t’u ankuar. Ne po punojmë që brenda 72 orëve të marrim përgjigjen e testeve”, tha Manastirlliu. /tesheshi.com/
