Ministrja e Shëndetësisë Ogerta Manastirliu ndoqi nga afër trajnimin e stafeve mjekësore që do të punojnë në qendrat shëndetësore verore, duke nisur nga Shëngji në Lezhë.
“E kemi nisur nga Lezha trajnimin e grupeve dhe stafeve tona, për sa i përket ndihmës së shpejtë. Duke shtuar dhe faktin që në këtë vit do të kemi edhe një shërbim të shtuar në gjithë qendrat shëndetësore verore, që është testimi i shpejtë. Ndaj dhe është duke u realizuar trajnimi, qoftë për sa i përket ndihmës së parë në këto struktura por edhe testimit të shpejtë anticovid. Për turistët që shfaqin shenja do përdoren testet e shpejta”, tha Manastirliu.
Sipas saj, ardhja e sezonit nuk do të thotë që virusi ka ikur.
“Fakti që jemi duke lehtësuar masat për sezonin turistik, por edhe për faktin që pandemia tashmë është në nivele të kontrolluara nuk do të thotë të ulim vigjilencën dhe të mos respektojmë protokollet, të cilat ende janë në funksion dhe për t’u zbatuar nga të gjithë qytetarët dhe gjithashtu rekomandohet që të jemi shumë të kujdesshëm në zbatimin e protokolleve, qoftë sa i përket protokollit të plazheve, qoftë protokollit në bare, restorante, për të mos lejuar përhapjen e infeksionit. Pra për ta patur nën kontroll, do duhet që të jemi shumë të kujdeshsëm dhe vigjilentë”, apeloi Manastirliu. /tesheshi.com/
