Pas tre vitesh, trofeu i Ligës së Europës nuk do të shkojë më në Spanjë. Ndeshjet gjysmëfinale të së enjtes kanë përcaktuar Mançester Junajtedin dhe Ajaksin si finalistë të këtij sezoni.
Mançester Junajtedi arrin për herë të parë në finalen e aktivitetit të dytë për nga rëndësia të futbollit europian për klube.
Një finale që mund të shpëtojë një sezon të tërë, pasi fitorja i siguron skuadrës angleze pjesëmarrjen në Champions League në sezonin e ardhshëm.
Lojtarët e Jose Mourinho-s e kishin fituar 0-1 takimin e parë, por barazuan 1-1 në fushën e tyre ndaj Selta Vigos. Fellaini do të shënonte në minutën e 17-të, gol që u ekuilibrua nga ai i Roncaglia-s në minutën e 85-të.
Nuk munguan as kartonat e kuq në këtë gjysmëfinale, nga një për çdo skuadër pranë mbarimit të lojës.
Në gjysmëfinalen tjetër, Olimpiku i Lionit u përpoq të përmbyste humbjen 4-1 të takimit të para një jave
ndaj Ajaksit, por nuk ia doli për pak gjë.
Francezët fituan 3-1 para tifozëve të tyre; një rezultat që nuk ua mundësoi synimin për të luajtur në finale.
Ajaksi kthehet të luajë në një finale europiane pas 21 vitesh. Në Stokholm do të vihen përballë më 24 maj lojtarët e rinj të ekipit të njohur holandez me skuadrën shumëmilionëshe të “djajve të kuq”. /tesheshi.com/
