Policia malazeze ka arrestuar disa tifozë shqiptarë në plazhin e Budvas vetëm se ata kanë valëvitur flamurin shqiptar, në atmosferën e ndeshjeve të europianit të Francës.
Siç bën të ditur gazeta më e madhe malazeze Vijesti, një gjykatë e Budvës i dënoi shqiptarët me 230 euro gjobë, me akuzën e shkeljes së ligjit mbi simbolet nacionale në një vend publik.
Vijesti bën të ditur se qytetarët shqiptarë po ktheheshin me makinat e tyre nga Kampionati Europian në Francë ku kanë ndjekur tre ndeshjet e kombëtares kuqezi.
Shqiptarët kanë ndaluar në Budva për të pushuar një natë me flamujt kombëtarë të vendosur në makinë, e që më pas kanë ecur nëpër qytet duke i rënë borive dhe thërritur në zë të lartë.
Pas kësaj qytetarë të shumtë të Budvës kanë lajmëruar policinë në telefon dhe janë ankuar për “zhurmën e shqiptarëve”.
Në fakt, ligji i Malit të Zi për sigurinë publike ndalon shpalosjen e një flamuri të një shteti tjetër në publik.
Realisht ky ligj është miratuar për të ndaluar që flamuri serb të përdorej nga nacionalistët, pasi siç duhet serbët përbëjnë rreth 30% të popullsisë në republikën e vogël.
Ky dënim u dha në një atmosferë kur në Mal të Zi është krijuar një ambjent anti-shqiptar.
Një botim i Akademisë së Shkencave të këtij vendi përmban në tekst fjalë dhe shprehje ksenofobe, ndërsa në qytetin e Tivarit disa rrugë janë emërtuar në nderim të disa ushtarakëve të vjetër malazezë që kanë vrarë shqiptarë me shumicë dhe kanë kryer spastrim etnik.
Megjithatë, në versionin online të gazetës Vijesti, shumë komentues akuzojnë policinë malazeze për një veprim jo të drejtë.
“230 për provokacija, aman jemi në Montekarlo këtu?”, thotë një komentues. Ndërkaq një tjetër shton: “Po kur serbët apo kisha serbe valëvit flamurin e Serbisë pse nuk gjobiten?” Kurse, një tjetër komentues thekson: “Jam shumë kurioz se çdo të ndodhte nëse do të valëvitej flamuri i SHBA-së”. /tesheshi.com/
