Prodhuesi kinez i smartfonëve, gjigandi i elektronikës Xiaomi po bëhet gati të lançojë automjetin e tij të parë elektrik dhe ka filluar të marrë porosi.
CEO Lei Jun njoftoi se modeli Speed Ultra 7 (SU7) do të kushtojë nën 500,000 juanë (65,255 euro). Kjo do ta vendosë gjigantin kinez të teknologjisë në konkurrencë me kompani të tilla si Tesla dhe BYD, raporton BBC.
Hyrja e Xiaomi-t në tregun e automjeteve elektrike vjen në një kohë të ngadalësimit të rritjes globale të shitjeve që ka ndezur një luftë çmimesh.
Firma kineze shpreson që sistemi operativ i automjetit SU7, dizajni i të cilit të kujton makinat sportive luksoze, do të jetë tërheqës për klientët, ashtu siç janë tërheqës smartfonët, laptopët dhe pajisjet e tjera.
Në 10 vjet, 10 miliardë dollarë
Sipas firmës kërkimore Counterpoint, Xiaomi është prodhuesi i tretë më i madh i smartfonëve në botë me 12 për qind të tregut.
SU7 do të prodhohet në objektin e prodhuesit shtetëror të makinave BAIC Group në Pekin, i cili mund të prodhojë 200,000 automjete në vit. Xiaomi do të investojë 10 miliardë dollarë në prodhimin e makinave gjatë 10 viteve të ardhshme.
Kina, tregu më i madh i makinave në botë, tashmë është i mbipopulluar dhe Xiaomi është një nga pak kompanitë e reja që hyn në treg, ndërsa autoritetet përpiqen të frenojnë fluksin e kompanive të reja. /tesheshi.com/
