Deputetja demokrate, Majlinda Bregu ka hedhur poshtë fjalët e qarkulluara në media se ajo mund të jetë pjsë e një qeverie të re “Rama 2” përballë kërcënimit të supozuar nga një manovër MetaX në bashkëpunim të supozuar me dike në partinë ku ajo bën pjesë.
“Nuk e di a është një fantazi vere për arsye të vapës dhe thatësirës së lajmeve, apo është një diversion i sponsorizuar nga njëri prej dy partnerëve të çiftit të palumtur, pra Rama ose Meta. Ajo qe di unë, është qe s’jam marrë asnjë minutë me hallet e çiftit dhe të partive respektive. Nuk kam patur asnjë ditë pikën e dëshirës për të qarë hallet e palumturisë së lidhjes së tyre”, – shkruan Bregu në Facebook.
Ajo shton se ka qenë e qartë në çdo deklarim qysh prej “kurorëzimit ” të lidhjes së çiftit Rama-Meta, që janë për njëri tjetrin, siç thotë populli në raste martesash jo fatlume: dy gjarpërinj në një jastëk!
“Më kanë dalë dhe tepruar hallet partisë time që duhet të bind njerëzit se nuk janë krejt pa shpresë. Ndarja mes Konfliktualit dhe Konsensualit nuk mund të jetë për asnjë moment shpresa e PD për t’ u rikthyer në qeveri. Rikthimi i PD në pushtet me alternativë qeverisjeje serioze, është i vetmi hall që më shqetëson. Është e sigurt se:
Nëse do ketë një qeveri Rama2, unë NUK do të jem pjesë e saj dhe nëse do ketë një makinacion MetaX une NUK do të bëhem pjesë e tij!”, – thotë Bregu duke hedhur poshtë çdo supozim të mundshëm. /tesheshi.com/
