Raportuesja e BE-së për Kosovën, Ulrike Lunaçek, ka deklaruar në mbledhjen e parë të Komisionit Parlamentar për Stabilizim Asociim, BE-Kosovë, se duhet të vazhdojë puna në Kuvend si nga ana e pozitës, ashtu edhe nga ana e opozitës.
“I çmoj shumë përfaqësuesit e të gjitha grupeve politike. Shpresoj që të gjithë ju do ta vazhdoni punën në këtë Kuvend. Edhe vetë kam qenë në opozitë, dhe shpesh nuk më ka pëlqyer çfarë ka bërë qeveria, por puna si parlamentar do të thotë se punët bëhen në mënyrë paqësore, përmes dialogut, për qytetarët tanë,” ka thënë ajo.
Lunaçek është shprehur se javët e shkuara kanë qenë inkurajuese për Kosovën, nisur nga Marrëveshja për Stabilizim-Asociim, nga pranimi i Kosovës në UEFA, nga marrja e rekomandimit pozitiv për liberalizimin e vizave, dhe, së fundmi, edhe nga pranimi i Kosovës në FIFA,” njofton Klan Kosova.
Por sipas saj, akoma nuk është fituar lufta e Kosovës për liberalizimin.
“Lojën për liberalizimin ende nuk e keni fituar. Kuvendi duhet ta ratifikojë Demarkacionin, si dhe duhet të vijojë luftimi i krimit të organizuar”, ka bërë të ditur Lunaçek. /tesheshi.com/
