Kreu i Partisë Demokratike, Lulzim Basha ka deklaruar ditën e sotme se vendi humbet 1 miliard euro në vit, të cilat sipas tij vidhen nga qeveritarët e korruptuar shqiptarë. Deklarata e tij erdhi fill pas takimit me përfaqësuesit e Fondit Monetar Ndërkombëtarë në Tiranë, të cilët, i njohu me situatën e rëndë ekonomike në vend dhe programin e opozitës.
“Folëm për përkeqësimin e gjendjes ekonomike në vend, që është rezultat i përkeqësimit të klimës së biznesit nga kjo qeveri. Shqipëria humbet 1 mld euro në vit që vidhen, përfundojnë pasuri në xhepat e qeveritarëve të korruptuar shqiptarë”, tha Basha.
Sipas kreut të opozitës ekonomia paraqitet në gjendje kritike, ndërsa ka përkeqësim të klimës së biznesit përmes korrupsionit, kontrabandës dhe evazionit.
Ai informoi se gjatë takimit nga njëra anë u bë konstatimi i gjendjes së rënduar ekonomike ku e ka katandisur vendin qeveria, sipas tij, dhe nga tjetër u paraqit plani i qeverisë për ta nxjerrë vendin nga kriza. /tesheshi.com/
