Lugina e Preshevës do të shpallë autonominë nëse lejohet krijimi i Asosacionit të Komunave serbe në Kosovë.
Përfaqësuesi politik i shqiptarëve të Luginës së Preshevës, Jonuz Musliu bën këtë paralajmërim, ndërsa më 25 Gusht në Bruksel rinis dialogu Prishtinë-Beograd ku do të diskutohet edhe për krijimin e Asosacionit. Kështu, kundërshtisë me të cilën po përballet Asosacioni në Kosovë, ku Vetëvendosje ka njoftuar reagim radikal, i shtohet edhe paralajmërimi I shqiptarëve të Preshevës.
“Nëse serbët e Veriut shpallin Asociacionin e Komunave apo autonomi edhe ne në Luginë të Preshevës do të shpallim autonominë, me të drejtë të bashkimit me shtetin tonë amë, Kosovën. Ky proces do të bëhet konform vullnetit dhe referendumit të 1-2 marsit të vitit 1992. Një akt i tillë është në përputhshmëri edhe me konventat ndërkombëtare dhe me Kartën e OKB-së, e cila garanton vetëvendosjen e popujve”, ka thënë Musliu, për agjencinë “Presheva jonë”.
Sipas Musliut, shqiptarët e Preshevës kanë kërkuar vazhdimisht të jenë pjesë e dialogut mes Kosovës dhe Serbisë, por një kërkesë e tillë është injoruar.
“Nuk po kërkojmë pushkë, as luftë, por thjeshë të inkuadrohemi në dialog”, thotë Musliu, duke dalë në përfundimin se pa zgjidhjen e problemit të Luginës së Preshevës s’do të ketë stabilitet në rajon.
Për zgjidhjen, vlen parimi i reciprocitetit, “atë që marrin serbët në Kosovë, të marrin shqiptarët në Luginë”. /tesheshi.com/
