Rëndohet situata në Teksas të SHBA, ku numri i viktimave të nga ana e policisë shtohet nga minuta në minutë, ndërkohë që Presidenti Barack Obama ka ndërhyrë nga Varshava për qetësimin e situatës.
Në qytetin Dallas të këtij shteti amerikan, janë vrarë pesë oficerë policie dhe plagosur gjashtë të tjerë nga snajperë të vendosur në pika kyçe të qytetit duke terrorizuar forcat e rendit, të cilët po mbanin qetësinë në protestën që u zhvillua kundër vrasjes së dy amerikanëve me ngjyrë nga policia në Minesota dhe Luiziana.
Metropoli i Teksasit, Dallas është në kaos prej të enjtes mbrëma dhe është ndaluar gjithçka që nga transporti publik dhe në rrugë janë shpërndarë forcat e FBI-së.
Tre nga snajperat janë arrestuar, ndërsa një tjetër vrau veten. Ky person, i cili qëndronte i fshehur në një parkim, u ka thënë policëve se në Dallas “janë vënë bomba gjithandej” dhe se “fundi po afron”.
Nuk dihet nëse personat që qëlluan policinë ishin protestues, por duket se janë të stërvitur ushtarakisht. Nuk dihet ende as motivi i tyre.
Demonstratën e nxitën vdekjet e Philando Castile në Minesota dhe Alton Sterling në Luiziana.
Protesta e Dallasit ishte një prej tubimeve të ngjashme të zhvilluara në mbarë Shtetet e Bashkuara kundër përdorimit të forcës letale të policisë ndaj afro-amerikanëve.
Philando Castile u qëllua për vdekje në makinën e tij pasi e kishin ndaluar për një stop të thyer, ndërsa Alton Sterling u vra edhe pse ishte i shtrirë në tokë e pa armë në dorë.
Të dyja rastet u filmuan, e pamjet e tyre rindezën akoma më fort atë që tashmë është kthyer në një debat kombëtar.
Nga Varshava ku ndodhet për samitin e NATO-s, ka folur edhe Presidenti Barack Obama, i cili e cilësoi ngjarjen si “të tmerrshme, të pajustifikueshme dhe të paramenduar”. Obama ka mbështetur forcat e rendit dhe ka thënë se është gati të çojë edhe ushtrinë.
/tesheshi.com/
