Edi Rama nuk u takua me Ilir Metën, siç është traditë dhe siç pritej.
Kreu i Kuvendit ka mbërritur në Tiranë që prej mbrëmjes të së martës dhe ka qëndruar në shtëpinë e tij në Gjirin e Lalzit, ku ka zhvilluar takime të rëndësishme politike.
Ndërkohë që në Kuvend, sekretari i përgjithshëm i LSI-së sulmonte egërsisht ministrin e Brendshëm, Saimir Tahiri, në portalet pranë Metës vazhdonte zhurma mbi pajisjet përgjuese.
Tashmë nuk është aspak një strategji në hije përplasja mes dy krerëve të mazhorancës. Pas videoskandalit të Peshkopisë, kemi një luftë poshtë brezit nga dyja palët.
Por kjo luftë ngjan si dy pika uji me konfliktin ndërmjet Fatos Nanos dhe Ilir Metës.
Edhe në këtë rast ndodh e njëjta gjë: sulme mediatike kundër ministrave më të fortë, por edhe tentativa të forta për të shkaktuar kryengritje brenda PS-së.
Kështu, në degën e PS-së së Shkodrës, Ilir Meta është futur thellë dhe ka bërë për vete një numër të madh socialistësh. E njëjta gjë ka ndodhur në Bulqizë, Dibër, e në vende të tjera.
Ndaj Rama nisi një spastrim total të bazës, duke e freskuar me njerëz besnikë.
Koço Kokëdhima, në fakt, po zbatonte “projektin pilot” të zëvendësimit apo të ndryshimit të supestrukturës së PS-së në bazë, e cila përgjithësisht nuk i ka marrëdhëniet e mira me Ramën.
Ndaj vendimi i Gjykatës Kushtetuese u duk se ishte pjesë e kësaj politike për të “vënë dorë në PS”.
Nuk është suprizë as qëndrimi i deputetes veterane Arta Dade, që ka shpallur një betejë të hapur me Edi Ramën, ndërkohë që prej verës së shkuar ka një marrëdhënie të mirë me Ilir Metën.
Nuk është aspak rastësi qenia në krah të Metës gjatë vizitës në SHBA e deputetit tjetër socialist, Anastas Angjeli, i cili ka qenë ministri i Financave i Ilir Metës gjatë “mbretërimit” të tij kryeministror. Siç e theksonte edhe Artur Zheji në analizën e tij për takimin Majko-Basha, Angjeli është i pakënaqur nga kryetari i tij.
Pra, mes palëve ka një luftë të ftohtë, që po ashpërsohet sa më tepër që kalojnë ditët dhe afrohen zgjedhjet.
Nuk është çudi që disa nga senatorët të cilët nuk do të kandidohen nga Edi Rama në zgjedhjet e ardhshme parlamentare të kandidohen nga LSI-ja, sipas modelit të vitit 2005. Kështu ka gjasa që si Hafizi, Dade apo Angjeli të jenë disa nga konkurruesit e Metës, duke synuar çarjen e votave të PS-së.
Por kësaj radhe, ndryshe nga epoka kur lindi LSI-ja, vërtetë ka një irritim të bazës socialiste ndaj Edi Ramës për shumë arsye, por hendeku i krijuar mes Ilir Metës dhe socialistëve nuk është mbushur as në gjysëm.
Ata nuk ia harrojnë flirtimin real, dhe atë virtual, me Sali Berishën… /tesheshi.com/
