Skllavëria, që konsiderohet nga historianët e analistët si shkaku themelor i konfliktit, nuk përmendet nga gjeneral Kell, shef i stafit i presidentit Trump, në komentet e veta. Kjo ka sjellë furi në rrjetet sociale.
Shefi i stafit të presidentit Donald Trump, gjenerali Xhon Kelli pretendon se paaftësia për të rënë në kompromis shkaktoi luftën civile amerikane. Duke folur për televizionin Fox News, Kelli po diskutonte për debatin më të fundit për heqjen e monumenteve dhe simboleve të Konfederatës.
Simbolet e Konfederatës kanë qenë burim kundërshtish në Shtetet e Bashkuara. Disa i shohin ato si një kujtesë ofenduese e historisë amerikane me skllavërinë, ndërsa të tjerë e konsiderojnë heqjen e tyre një përpjekje për të shkatërruar historinë amerikane dhe kulturën e Jugut.
Por, komentet e tij nxitën një debat të furishëm në median sociale, sikundër edhe mes analistëve që i cilësuan të trishtuara dhe negative. Fraza “luftë civile” ishte në modë brenda një kohe të shkurtër në Amerikë – e përdorur më shumë se 30 mijë herë në Twitter që kur Kelli dha komentet e veta.
Chelsea Clinton dhe Bernice King, vajza e liderit të të drejtave civile, Martin Luther King, ishin mes zërave kundërshtues.
Gjenerali Kelli po ashtu e përshkroi gjeneralin e Konfederatës, Robert E Lee si “një njeri të respektueshëm” i cili “hoqi dorë nga vendi i tij për të luftuar për shtetin e tij”. “Ka disa gjëra në histori që ishin të mirë dhe gjëra të tjera që nuk ishin dhe aq të mira”, tha ai.
“Unë mendoj se ne bëjmë gabim si shoqëri dhe me siguri edhe si individë, kur marrin atë që pranohet si e drejtë dhe e gabuar, dhe shkojmë pas 100, 200, 300 vjet apo më shumë dhe themi : ‘ajo që bëri Kristofor Kolombi ishte e gabuar’”, tha ai.
“Mungesa e aftësisë për kompromis solli luftën civile. Dhe burrat e gratë me vullnet të plotë nga të dyja palët morën pozicionet e tyre aty ku ua diktonte ndërgjegja”.
Ndarja e shteteve jugore në vitet 1860-61, dhe konflikti i armatosur që pasoi deri në vitin 1865, erdhi pas dekadash armiqësie në rritje për çështjen e skllavërisë, dhe zgjedhjen e Abraham Linkolnit, i cili ishte i prerë në kundërshtimin e skllavërisë, si president në vitin 1860.
Duke folur për BBC-në, tre historianë të njohur të luftës civile amerikane thanë se kishte konsensus se skllavëria ishte arsyeja kyçe për luftën civile.
Jim Grossman e përcaktoi kështu: “Kur njerëzit thonë se ishte për të drejtat e shtetit, në vitin 1861, shtetet nuk kishin asgjë për të mbrojtur veç skllavërisë”.
“Ato u ndanë për shkak se mendonin se zgjedhja e Linkolnit kërcënonte institucionin e skllavërisë”.
“Ka njerëz që nuk janë të lumtur me këtë përgjigje, të cilët do të donin ta shihnin luftën civile sikur nisi nga diçka tjetër”.
Kritikët heqin paralele midis komenteve të general Kellit dhe atyre të bëra nga presidenti Trump pas dhunës në një tubim të së djathtës ekstreme në gusht, në Charlottesville.
Një grua u vra dhe disa të tjerë u plagosën kur një supremacist i bardhë ngau makinën e tij në një turmë me kundër-protestues. Presidenti Trump nxiti debate në atë kohë duke ia lënë fajin për dhunën “të dyja palëve”.
Komentet e gjeneralit Kelli vijnë ndërsa presidenti Trump përballet sërish me hetime për lidhje të mundshme midis ekipit të tij të fushatës dhe Rusisë. Këshilltari i fushatës elektorale, George Papadopoulos është deklaruar fajtor pasi ka gënjyer FBI-në për kohën e takimeve.
Ish-menaxheri i fushatës së Trump, Paul Manafort dhe bashkëpunëtori i tij, Rick Gates, janë në arrest shtëpie pasi mohuan 12 akuzat ndaj tyre që përfshijnë komplot kundër Shteteve të Bashkuara e pastrim parash.
Përgatiti: Juli Prifti – /tesheshi.com/
