Një ndër emrat që ka nisur të qarkullojë së fundi si kandidat i mundshëm për President, është dhe ai Fatos Lubonjës, publicist dhe analist i pavarur, i cili ka bërë gjithnjë oponentin ndaj çdo kahje politike.
I pyetur nga News 24 për këtë mundësi, ai ka shfaqur shenja pranimi, ndonëse me shumë rezerva; sidomos duke cituar veten teksa tre partitë kryesore i ka quajtur banda. “Unë i kam kritkuar tre partitë si banda, e tani me duhet consensus që t’i përfaqsoj këto banda”, ka thënë Lubonja.
Në 27 vite pluralizëm, Fatos Lubonja ka patur një aktivitet të ethshëm publik në pozicionin e një kritiku. Fillimisht ai ka qenë një ndër kundërshtarët më të flaktë të Berishës, që nga koha kur ky u zgjodh President, për t’u shndërruar më pas në kritik po aq të flaktë të Ramës, pas një miqësie të gjatë e gati vëllazërore.
Lubonja nuk ka qenë kurrë pjesë e ndonjë partie politike, por në vitin ‘97 themeloi Forumin për Demokraci së bashku me Kurt Kolën dhe Daut Gumenin, për t’u kundërvënë gjysëm me forma gjysëm politike dhe gjysëm intelektuale pushtetit të Berishës. Gjithashtu, Lubonja nuk ka mbajtur asnjëherë poste shtetërorë. /tesheshi.com/
