Pas përfundimit të takimit me grupin parlamentar të Partisë Demokratike lidhur me reformën në drejtësi, ambasadori i Shteteve të Bashkuara të Amerikës në Shqipëri, Donald Lu, vlerësoi rolin e kësaj partie në politikën e vendit, ndërsa ambasadorja e BE-së, Romana Vlahutin tha se do ketë mekanizëm monitorues shumë serioz, që ajo që është shkruar në letër të bëhet realitet.
“Me fundin e komunizmi, fitoren e luftës në Kosovë dhe anëtarësimin në NATO, Partia Demokratike ka luajtur rol vendimtar dhe presim që kjo tani të vijojë në kontekstit e reformës në drejtësi”, u shpreh Lu.
Roamana Vlahutin e cilësoi diskutimin e zgjatur për afro dy orë gjatë ditës së sotme, si shumë të dobishëm dhe konstruktiv. Ajo tha se mendon se janë sqaruar disa çështje që më parë nuk ishin të qarta.
“Kemi rënë dakord se jemi partner dhe aleat për të mirën e Shqipërisë. Të gjitha energjitë tona në ditët në vijim do të fokusohen që reforma të përfundojë. Reforma ka rëndësi të madhe për BE. Do sigurohemi se do ketë mekanizëm monitorues shumë serioz, që ajo që është shkruar në letër të bëhet realitet për qytetarët e Shqipërisë”, deklaroi ambasadorja Vlahutin. /tesheshi.com/
