Nga Ylli Pata
Ambasada amerikane po udhëheq përpjekjet e saj për të arritur një konsensus mes Partisë Socialiste dhe Partisë Demokratike për reformën në drejtësi.
Pas takimit të ambasadorit Donald Lu me ish-kryeministrin Sali Berisha dhe kreun e PD-së, Lulzim Basha në rezidencat e ambasadës së SHBA në kodrën Rilindja në Sauk është zhvilluar një diskutim “i ç’tensionuar” ndërmjet kreut të komisionit të reformës në drejtësi Fatmir Xhafës dhe të ngarkuarit të Bashës në selinë blu, Enkelejd Alibeajt.
Të dy palë nën edhe prezencën e ekspertëve ndërkombëtarë të SHBA-së dhe BE-së që kanë hartuar draftin, kanë nisur të përgatisin një draft të vetëm që do të ripërpunohet në bazë të rekomandimeve paraprake të Komisionit të Venecias.
Siç mësohet, thelbi i reformës në drejtësi, që është ngritja e Këshillit të Lartë të Gjyqësorit dhe zgjedhja e një Kryeprokurori me 3/5 e votave nga Parlamenti duke mënjanuar Presidentin, nuk është kundërshtuar nga komisioni i Venecias, i cili megjithatë ka bërë disa rekomandime kryesisht përsa i takon mospërfshirjes së ministrit të Drejtësisë në procesin e përzjedhjes së gjyqtarëve dhe prokurorëve të rinj, si dhe shkarkimit të tyre në të ardhmen.
Partia Demokratike, siç mësohet, ka dy probleme që vijnë nga dy grupime brenda saj, një pjesë që e kundërshton fare reformën me drojën se kjo do të sjellë një rënie të sistemit gjyqësor të ngritur në 25 vjet, dhe një pjesë që është gati të bëjë kapërcimin e madh që mund t’i sigurojë mbështetje ndërkombëtare, por kërkon një pretekst për të arritur një “fitore” të vogël, qoftë dhe virtuale, vetëm që të mos akuzohet nga pala tjetër si tradhëtare.
Me ndërmjetësinë e ambasadorit amerikan, Xhafaj dhe Alibeaj kanë rënë dakord të punojnë së bashku për një draft të amendamenteve kushtetuese për gjyqësorin, i cili më pas do të përmirësohet në fund.
Ende nuk dihen detajet teknike të kësaj përpjekjeje, por siç mësohet, Prokurori dhe Këshilli i Lartë i Gjyqësorit do të zgjidhen dhe varen nga parlamenti por jo nga mazhorancat, duke vendosur konsensusin si bazë.
Vetë kreu i komisionit të reformës, Fatmir Xhafaj edhe publikisht u shpreh i gatshëm të rishikohet teksti me kusht që të arrihet konsensusi me PD-në.
Pas draftit të Venecias, Xhafaj tha se “jemi të kënaqur dhe dhe i mirëpresim të gjithë të bashkohen rreth mbështetjes që i ka dhënë Komisioni i Venecias riorganizimit të Gjykatës së Lartë, riformatimit të Këshillit të Lartë të Gjyqësorit, nevojës për ngritjen e disa institucioneve kushtetuese, si Këshilli për Emërimin, Tribunali Disiplinor, Inspektoriati i Lartë i Drejtësisë, Këshilli i Lartë i Prokurorisë, Prokurorisë së posaçme Antikorrupsion. Të gjitha këto i ka mbështetur raporti i Komisionit të Venecias. Ka mbështetur fort procesin e rivlerësimit të gjyqtarëve dhe prokurorëve. Raporti i Komisionit të Venecias thotë se ky është një proces i domosdoshëm që duhet kryer në drejtësinë shqiptare”, tha Xhafaj.
Bën përshtypje mosmarrja pjesë në konsultime e LSI-së, e cila në Parlament është një faktor shumë i rëndësishëm me 20 deputetë. Por ambasada amerikane dhe ajo e BE-së është fokusuar në marrëveshjen Rama-Basha.
Kjo ka irrituar edhe mjaft qarqe politike në vend. Andi Bejtja, gazetari i njohur, i cili ka shfaqur hapur afilicionin pranë qëndrimit të Berishës dhe sidomos Ilir Metës, u shpreh shumë ashpër kundër një marrëveshje PD-PS, madje duke e quajtur me fjalë të rënda si “revolucion kinez”, duke ironizuar me origjinën e ambasadorit të SHBA-së në Tiranë, Donald Lu. /tesheshi.com/
