Ka folur më së fundi dhe njeriu i të troçtave, ambasadori Lu, rreth çështjes më përvëluese të këtyre ditëve në Shqipëri, asaj të Saimir Tahirit, nëse duhet të shkonte arrestohej ose jo. Dhe, ashtu siç një ditë më parë Hoyt Brian Yee, edhe Lu ka tentuar të jetë i ekulibruar; pra të lë të kënaqur dhe njërën dhe tjetrën palë politike. Së pari ai ka kujtuar se si nën komunizëm njerëzit çoheshin në burg pa prova, duke lënë të nënkuptuar se kjo gjë nuk duhet të ndodhë në kushte demokracie, qoftë dhe me një politikan; e nga ana tjetër ka kujtuar se shumë sosh i kanë shpëtuar gjykimit në këto vite.
“Në 27 vite shumë politikanë i kanë shpëtuar drejtësisë. Nuk më takon të them nëse Tahiri është fajtor apo jo. Qytetarët duhet të dinë të vërtetën. Nëse është pa faj duhet ta dini nëse ka faj duhet të përballet me drejtësinë. Askush nuk duhet të jetë mbi ligjin”, ka thënë Lu, prezent në një aktivitet mbi arsimin e lartë.
Dhe i pari që ka dashur të përfitojë prej mesazheve të tij, ka qenë vetë kryeministri Rama.
“Faleminderit Don. Një mesazh i qartë për shqiptarët që duan drejtësi, jo gjyqe komuniste për këdo që kanë votuar a paguar me taksat tyre”, është shprehur Rama në FB, duke sjellë dhe një risi: përkëdheljen që i ka bërë ambasadorit me anë të shkurtimit të emrit – Don – si për të treguar dhe një lloj afërsie shoqërore me të. /tesheshi.com/
