Lëvizja Socialiste për Integrim, i është lëshuar sot deputetit Pandeli Majko, duke përgënjeshtruar deklaratat e një dite më parë të tij gjatë një interviste për Zërin e Amerikës, ku Majko tha se diskutimet e reformës në drejtësi prodhuan tensione mes koalicionit qeverisës.
Petrit Vasili, zëri politik i Ilir Metës, tha se qëndrimi i LSI-së ka qenë konsistent sa i përket reformës dhe raporteve me PS.
“Nuk ka asnjë keqkuptim për reformën në drejtësi lidhur me qëndrimin e LSI-së dhe z. Meta. Jam i bindur që z. Majko nuk është i informuar, që në tavolinat e nivelit të lartë të koalicionit që nga dita e parë kur kjo reformë filloi të hartohej edhe deri në miratimin e saj në mesnatën e 21-22 korrikut, qëndrimi i z. Meta dhe i LSI-së ka qenë i palëvizshëm për të pasur një reformë në drejtësi sipas standardeve të Venecias dhe me konsensus”, tha Vasili, duke shprehur mosdakortësi me Majkon dhe në pretendimet e këtij të fundit për një afrim të LSI-së me PD-në, por me një gjuhë evazive, të tipit “as po as jo”.
“LSI ka qenë një forcë shumë korrekte në raportet e saj me koalicionin dhe ky qëndrim ka qenë i qartë edhe në tavolinat e nivelit më të lartë të koalicionit, por edhe në të gjitha nivelet e tjera të komunikimit ku unë kam qenë i pranishëm edhe personalisht. LSI dhe Ilir Meta nuk kanë vënë asnjëherë kushte apo kushtëzime pushteti ndaj Edi Ramës dhe PS-së. Por ka pasur vetëm një kusht, që është vendosur nga LSI për PS-në para zgjedhjeve të vitit 2013 dhe ai ishte që Partia Socialiste, në opozitë në atë kohë, të votonte tre ligjet që ishin detyrim i integrimit europian, pasi ekzistonte shqetësimi i madh se në rast se koalicioni PS-LSI nuk do të arrinte 84 vota, Berisha do të bënte të njëjtën gjë duke penguar procesin e integrimit evropian të vend”, tha më tej kreu i grupit parlamentar të LSI-së, gjuha e së cilit parathotë dhe lëvizjet politike të Metës.
Më interesante në gjithë këtë debat të funditm mes aleatëve në koalicion, të cilët kanë shfaqur jo pak fërkime, është përfshirja dhe e Pandeli Majkos si njeri aktiv në politikën e ditës. Deri më sot, Majko qëndronte i heshtur, edhe për shkak të mosangazhimeve në poste të caktuara, ku ajo që i veçhej ishin deklarime të llojit patetik në parlament apo në FB. Por më qëndrimin e fundit karshi raporteve të koalocionit, ai i rikthehet politikës për të qenë aktor në pjesën më të nxehtë të saj, marrëdhënieve të PS-së me LSI-në. /tesheshi.com/
