Lëvizja Socialiste për Integrim ka ofruar sot edhe presidentin në paketën e kompromisit mes opozitës e mazhorancës. Pasi u zgjodh në këtë detyrë Ilir Meta, kryetar i kësaj partie dhe aleat i Ramës, pasardhësi i tij Petrit Vasili tha sot se “LSI është e gatshme të kthejë edhe postin e Presidentit të Republikës në shërbim të zgjidhjes së shpejtë të krizës”.
Edhe një herë LSI doli si pajtuese gjakrash, ashtu siç bëri gjatë gjithë kohës që opozita nguli çadrën në shesh, kur Meta deklaronte se nuk futej në zgjedhje pa opozitën. Por, kur ai vendosi të pranojë propozimin për t’u bërë president opozita u ndje e prerë në besë. Posti i presidentit ishte një nga pikat e paketës “McAllister” i ofruar për një emër konsensual opozitës.
Në një deklaratë për mediat Vasili i bëri thirrje forcave politike që të mos humbasin asnjë orë më shumë dhe t’i japin zgjidhje krizës.
Sipas z. Vasili, LSI i ka qëndruar dhe i qëndron paketës së kompromisit të ofruar nga z. McAllister./tesheshi.com
