Lëvizja Socialiste për Integrim thotë se hetimi ndërkombëtar i skandalit të CEZ do të shërbejë si katarsis për partinë Demokratike, e cila mund të pastrohet me këtë rast nga ish-ministrat e saj të korruptuar. Ylli Manjani, sekretari Organizativ i LSI-së në një dalje për mediat u shpreh i vendosur për të mbështetur hetimin ndërkombëtar për aferën e CEZ.
“E mbështesim fuqimisht hetimin ndërkombëtar, mundësisht me prokurororë amerikanë. Mbështesim hetimin e çështjes CEZ që nga fillimi deri në fund, çdo detaj. Si erdhi? Kush e solli? Çfarë ecurie ka patur CEZ? Si u lidh kontrata me DIA-n dhe me 7 të tjera si puna e DIAs?”, tha Manjani.
Sipas Manjanit, PD duhet përgëzuar për nismën e marrë jo vetëm për hetimin ndërkombëtar të CEZ, por edhe për të pastruar veten nga ish-ministra dhe ish-kryeministri.
“Duhet mbështetur sepse nëse kjo nismë do të shkojë deri në fund dhe duhet të shkojë deri në fund, patjetër që do të dalin shumë të vërteta. E mbështesim këtë hetim për këtë dhe për çdo rast tjetër. Do kërkojmë të kemi sa më shumë prokurorë të huaj në vendin tonë”, tha Manjani. /tesheshi.com/
