Social-demokratët e LSDM apelojnë Nikolla Gruevskin dhe drejtuesit e tjerë të VMRO-DPMNE-së të pranojnë programin e ri qeveritar, nëse janë për një shtet të bashkuar e të pavarur ku të funksionojë Drejtësia.
Ata kanë kërkuar që VMRO të përkrahë Prokurorinë Speciale, duke i kujtuar kësaj partie se duhet ta pranojë realitetin e ri që është në opozitë e të mundësojë transferim të qetë të pushtetit.
“Gruevski dhe udhëheqësia e VMRO-DPMNE-së, janë të gatshëm që për mbrojtjen e pasurisë së tyre të grumbulluar në mënyrë kriminale dhe për t’i ikur përgjegjësisë, të shqetësojnë qytetarët me gënjeshtra, të nxisin dhunë dhe urrejtje, të lusin të jenë pjesë e Qeverisë. Maqedonia nuk duhet dhe nuk do të lejojë që të futet në krizë të sigurisë vetëm për shkak se Gruevski nuk mund të pranojë se rreth 700 mijë qytetarë, përkatësisht 67 deputetë kanë dhënë përkrahje për formimin e Qeverisë së re të Zoran Zaevit”, thuhet në komunikatën e LSDM-së.
Nga LSDM thonë se është e nevojshme që Ivanov menjëherë të japë mandatin për formimin e Qeverisë së re.
Nga ana tjetër partitë politike shqiptare kanë kërkuar nga lideri i LSDM-së, Zoran Zaev që të thërrasë Kuvendin dhe të formojë Qeverinë e re edhe pa përkrahjen e presidentit Ivanov. /tesheshi.com/
