LSDM vazhdon të realizojë konsultime me partitë shqiptare për përmbylljen e seancës konstituive të Kuvendit, formimin e trupave parlamentarë si dhe zgjedhjen e kryeparlamentarit. Pas takimit të djeshëm me kreun e BDI-së, Ali Ahmetin, ku si prioritet u caktua rivënia në funksion e institucioneve të vendit, veçanërisht Kuvendit, lideri i LSDM-së, Zoran Zaev gjatë ditës së sotme ka takuar një delegacion të Lëvizjes Besa me në krye kryetarin e kësaj partie, Bilall Kasami, nënkryetarin Zeqirja Ibrahimi dhe kryetarin e RDK-së, Fadil Zendeli.
Sipas Kasamit ky takim ishte në drejtim të konsultimeve për zhbllokimin e institucioneve me qëllim që Maqedonia të kthehet në procesin e integrimeve dhe vazhdimin e punës së institucioneve.
Në një kumtesë me shkrim të lëshuar pas takimit, nga Lëvizja BESA njoftuan se kjo parti do të vazhdojë edhe më tej me rolin konstruktiv në zhbllokimin e institucioneve dhe zgjidhjen e problemeve me të cilat ballafaqohet vendi.
“Gjithashtu janë biseduar edhe modalitetet e mundshme për dalje nga kriza me të cilën po ballafaqohet vendi, për të kërkuar mundësi për funksionalizimin e institucioneve. Kontaktet ndërmjet partive do të vazhdojnë edhe ditët në vijim. Shfrytëzojmë rastin që edhe një herë të potencojmë se Lëvizja BESA edhe më tej do të luajë rol konstruktiv duke qenë pjesë e zgjidhjes e jo pjesë e problemit”, thuhet në njoftimin e Lëvizjes BESA.
Ndërsa nga partia e Zoran Zaevit nuk caktuan një datë se kur pritet të thirret vazhdimi i mbledhjes konstituive, por thanë se kjo do të mësohet pasi të përfundojnë konsultimet me të gjitha partitë.
“Ju jeni dëshmitarë se gjatë kësaj jave në rrjedhë janë konsultime me partitë politike që kanë dhënë nënshkrimet për ta marrë mandatin për formimin e qeverisë së re. Kur të kemi situatë të qartë do të njoftojmë opinionin…E dini, mbrëmë kishim takim me BDI-në, tani kemi me lëvizjen BESA. Duhet të dalim me konkluzione të përbashkëta për të gjitha çështjet dhe do ta njoftojmë opinionin për konkluzionet”, ka deklaruar Petre Shilegov, zëdhënës i LSDM-së.
Shilegov edhe një herë i bëri thirrje presidentit Gjorgji Ivanov që të respektojë vullnetin e shumicës së qytetarëve dhe t’i jep mandatin kreut të kësaj partie, Zoran Zaev.
Ai po ashtu ka akuzuar presidentin Ivanov për udhëtimin e tij në Azerbejxhan, kështu duke lënë vendin pa udhëheqës pasi Kuvendi nuk ka kryetar, ndërsa Qeveria është me mandat të kufizuar./tesheshi.com/
