Prokuroria Speciale e Kosovës ka ngritur aktakuzë pranë Gjykatës Themelore në Prishtinë kundër ministrit për Kthim dhe Komunitete, Dalibor Jevtiç. Përveç tij, Prokuroria ka ngritur aktakuzë edhe ndaj Nenad Stojçetoviç, që është sekretar në po të njëjtën ministri, si dhe ndaj Mihailo Prlinçeviç, drejtor i departamentit të administratës dhe financave të kësaj ministrie.
Sipas aktakuzës, tre të pandehurit, D.J., N.S. dhe M.P., në cilësinë e personave zyrtarë, duke shfrytëzuar detyrën apo autoritetin zyrtar i kanë tejkaluar kompetencat dhe autorizimet e tyre me qëllim që të përfitojnë çfarëdo dobie për vete apo personin tjetër dhe njëkohësisht t’i shkaktojnë dëme ministrisë përkatëse.
“I pandehuri D.J., ka nxjerrw njw vendim me të cilin i jep në shfrytëzim të përhershëm të një (1) automjeti zyrtar pronë e Ministrisë një kompanie private, përkatësisht Radio KIM –TV Centar, me seli në Çagllavicë komuna e Graçanicës”, thotë Prokuroria Speciale e Kosovës, përmes një njoftimi për media.
“Ndërkaq, i pandehuri N.S, si person përgjegjës për menaxhimin e pasurisë se kësaj Ministrie duke e ditur se një vendim i tillë është i kundërligjshëm pajtohet me një veprim të tillë dhe urdhëron zyrën ligjore të kësaj Ministrie që të përpiloj kontratën (marrëveshjen) mbi dhënien e automjetit në shfrytëzim të përhershëm Radio KIM TV-Centar me seli në Çagllavicë”.
“I pandehuri i tretë, M.P. akuzohet si person përgjegjës në departamentin e administratës dhe financave në këtë Ministri, duke nënshkruar kontratën me nr.172/2 të datës 11.02.2014 në mes të ministrisë dhe Radio KIM TV- Centar me seli ne Çagllavicë duke dhënë në shfrytëzim të përhershëm automjetin e përmendur zyrtar”, thuhet në komunikatë.
Tre të pandehurit me këto veprime, në bashkëkryerje kanë kryer veprën penale, keqpërdorim i pozitës apo autoritetit zyrtar./tesheshi.com/
