Një zhvillim i pazakontë po ndodh në Irlandë, me shkas lotarinë kombëtare të këtij vendi. Disa pjesëmarrës në këtë lotari kanë publikuar në mediat sociale një foto, me anë të së cilës ata shprehin dyshimin se një nga topat fituese kishte dy numra të ndryshëm.
Konkretisht, topi me numrin 38 kishte edhe numrin 33, tamam si një iluzion optik që u ka marrë mendjen të gjithëve, e ku të gjithë dyshojnë për një mashtrim të organizatorëve.
Ky top u tërhoq gjatë Lotto Plus 1 të shtunën në mbrëmje, së bashku me numrat 1, 4, 29, 45, 46 dhe topin bonus 26.
Regjistrimi i TV RTE tregon se topi i 38 ishte tërhequr i dyti.
Gjatë kohës që është rrotulluar nëpër gyp, shihet qartë se bëhet fjalë për topin me numrin 38, por pasi janë tërhequr dy topa të tjerë, në po atë top në njërën anë numri i shfaqur është 33.
Nuk është e qartë se çfarë e ka shkaktuar pikërisht këtë iluzion të çuditshëm, por kjo ka bërë që përdoruesit e mediave sociale ta quajnë tërheqjen “të kurdisur”.
Shumë përdorues komentuan se ata “gjithmonë e dinin se ishte e kurdisur e gjithë loja”, dhe se topi kishte një numër shtesë në të, por të tjerë shpejt treguan se e gjithë kjo mund të jetë shkaktuar nga efekti i dritës.
“Lotaria Kombëtare dëshiron t’i bindë lojtarët e saj në integritetin e Loto Plus 1 të së shtunës”, tha zëdhënësja e kësaj lotarie.
“Reflektimi afatshkurtë i dritës gjatë tërheqjes së numrave shkaktoi një iluzion, andaj disa lojtarë dyshuan se kishte dy numra të ndryshëm në topin me numrin 38. Kjo nuk qëndron. Pesha dhe madhësia e të gjitha topave Lotto, si dhe numrat kontrollohen rreptësisht para çdo tërheqjeje. Ky proces si dhe tërheqja, monitorohen në mënyrë të pavarur nga anëtarët e komisionit të KPMG-së”, sqaroi ajo. /tesheshi.com/
