Kryeministrja italiane Giorgia Meloni kritikoi të enjten Francën dhe Gjermaninë se nuk ishin ftuar në një darkë në Paris me presidentin ukrainas Volodymyr Zelensky.
Presidenti francez Emmanuel Macron dhe kancelari gjerman Olaf Scholz u takuan me Zelensky-n të mërkurën në mbrëmje në Paris, përpara samitit të Bashkimit Evropian të enjten, raportoi Reuters.
Por ndryshe nga viti i kaluar kur kryeministri i atëhershëm italian Mario Draghi punoi krah për krah me Macron dhe Scholz për çështjen e Ukrainës, Meloni nuk ishte e ftuar.
Duke folur me gazetarët ndërsa mbërriti në samitin në Bruksel, Meloni, e cila mori detyrën si kryeministre tetorin e kaluar, tha se mendonte se ishte e papërshtatshme.
“Mendoj se forca jonë në këtë luftë është uniteti”, theksoi ajo.
Meloni më vonë u takua me Zelensky-n në samitin e BE-së.
E pyetur për të komentuar deklaratën e saj, Macron tha se mendonte se darka e organizuar mbrëmë ishte e përshtatshme.
“Siç e dini, Gjermania dhe Franca kanë pasur një rol të veçantë kur bëhet fjalë për Ukrainën për tetë vjet,” u tha Macron gazetarëve, duke iu referuar ndërmjetësimit të përbashkët midis dy vendeve që janë përpjekur pa sukses për të parandaluar një konflikt midis Rusisë dhe Ukrainës. /tesheshi.com/
