Deputetja e vjetër e PS-së po bën aktoren në situatën politike të acaruar të koalicionit, duke votuar kundër aleatit të ri, PDIU-së, dhe duke flirtuar me LSI-në e Metës apo Blushin me vetëkandidimin për presidente.
“Ke ardhur me fustan basme në PS,” i tha Fatos Nano dikur Arta Dades, një prej deputeteve më të vjetra të kësaj partie, e angazhuar që në vitin ’91 pranë kampit socialist. Nano kishte mënyrën e tij për t’i diskredituar kundërshtarët politikë. Në atë kohë Dade ishte rreshtuar krah Ilir Metës, për të cilin nuk e ka humbur simpatinë dhe pse nuk i shkoi nga pas në LSI.
Së fundmi, Dade ka bërë dy-tre lëvizje politike që e çojnë ujin tek LSI-ja e Metës dhe tentojnë të vënë në provë Ramën e PS-në duke marrë shkas nga zhvillimet e fundit politike; problemet në koalicionin PS-LSI, fuqizimi i PDIU-së në qeverisje, dhe loja në zgjedhjet e presidentit të ri, që është afër.
Sapo u përfol se presidenti i ri mund të ishte një grua, dhe emri i artikuluar ishte ai i Mimi Kodhelit, ministres së Mbrojtjes, mikeshë e Edi Ramës dhe bashkëpunëtore e ngushtë e tij, Dade doli në skenë. Një grua? Pse të mos jem unë? Kështu Dade i tregoi Ramës se para Kodhelit ka gra të tjera me karrierë politike në PS, ish-ministre, etj…; aq më shumë që nënkuptonte se përveç partisë së saj mund të kishte dhe votat e LSI-së.
Së dyti, Dade hodhi zjarr në lidhjen e dashurisë mes Ramës dhe Idrizit. Si kryetare e Komisionit të Politikës së Jashtme në Kuvend, ajo votoi kundër rezolutës së paraqitur nga PDIU-ja në Kuvend për këtë çështje. Edhe me këtë veprim ajo i shërbeu ftohjes së aleancës Idrizi-Rama, që po dobëson nga ana tjetër rolin e Metës në koalicion.
Nuk ka vonuar përgjigjja nga ana e PDIU-së, duke e parë votën e Dades si personale, dhe jo si votë të socialistëve. Madje PDIU-ja i kujton asaj se me këtë lojë politike nuk mund të arrijë ambicien për t’u bërë presidente.
Kryetarja e Forumit të Grave të PDIU-së, Vjollca Braho, tha sot se, “Zonja Dade mund të kërkonte ndjesë që, si ish-ministre e Jashtme dhe si kryetare aktuale e Komisionit Parlamentar të Politikës së Jashtme, jo vetëm që nuk ka folur asnjë fjalë për zgjidhjen e Çështjes Çame, por edhe ka votuar kundër Rezolutës Çame. Por fatkeqësisht nuk e ka bërë! Dhe sot rishfaqet në skenë si kundërshtarja më e ashpër e atyre 300 mijë çamëve që falë punës dhe përpjekjes së PDIU-së kanë rifituar shpresën për të marrë dinjitetin që u është nëpërkëmbur nga politikanë si zonja Dade. Të qenit president i Republikës është kulmi i karrierës së një politikani, por zonja Arta Dade nuk do ta arrijë dot duke sulmuar PDIU-në sepse ashtu e kanë urdhëruar ata që e kanë frikë rritjen e saj.”
Dade nuk ka qenë simpatizante e kreut të ri të partisë, Edi Ramës, ashtu siç nuk i kishte mirë marrëdhëniet me ish-kreun Fatos Nano. Ka shfrytëzuar gjithmonë rastin për ta kritikuar Ramën ose për të qenë në një linjë me kundërshtarët e tij. Në një intervistë të dhënë sot në News24, ajo përmend si kolegë të saj dy deputetë të larguar nga PS-ja, Ben Blushin dhe Mimoza Hafizin, duke mbështetur propozimin e tyre për një president nga populli.
Duke u vetëkandiduar për presidente përballë të preferuarës së Ramës, ajo i tregon atij se nuk i ka votat për ta zgjedhur presidentin as brenda partisë, jo më me aleatin problematik, LSI-në. /tesheshi.com/
