Ministri i Rendit Sandër Lleshaj e quajti “rrufe në qiell të hapur” jetëhumbjen e Klodian Rashës nga plumbat e një efektivi policor, duke e konsideruar njëherësh si “të pakuptueshme” atë që ka ndodhur në mesnatën e para një jave në një rrugicë të Laprakës.
“Fatkeqësisht situata nuk ka qenë për armë. Reagimet e para ishin për tejkalim të kushteve të nevojshme.
Unë mora këtë vendim, sepse ligji u tejkalua. Edhe deklarata e sotme e Prokurorisë, ishte në fakt deklaratë e SHÇBA-së.
Veprimi ishte i pakuptueshëm!
Është ngjarje e rëndë dhe e pakuptueshme dhe do të duhet të sqarohet thellë, ndërsa duhen hetime edhe më tej. Duhet dhënë përgjigja se ‘pse ndodhi ngjarja’”, tha Lleshaj në Real Story të Sokol Ballës.
Sipas tij, dorëheqja ishte një akt që duhet të ndodhte dhe se atë nuk e ka ndërmarrë nën asnjë lloj presioni.
“Humbja e jetës së një njeriu në terren më detyroi të reflektoj së pari si njeri në respekt të familjes të të ndjerit, që drejtoi sytë nga shteti.
Motivi tjetër ishte edhe politik. Për këtë ngjarje, reaguan edhe ata përfaqësues të politikës së vjetër, që janë përgjegjës për ngjarje të tmerrshme që kanë ndodhur në mes të Tiranës dhe që justifikojnë dhunën shtetërore dhe barbare në mes të qytetit.
Unë reagova dhe ndaj tyre, për t’ju thënë se nuk jam njësoj me ju. Por e para ishte reagimi moral e njerëzor ndaj familjes, që priste nga shteti një vlerësimk serioz”, tha Lleshaj, duke shtuar:
“Është fare e thjeshtë kam dhënë dorëheqjen me qetësi dhe shumë vendosmëri. S’ka pasur asgjë tjetër.
Mendoj që unë nuk jam person që heq dorë lehtësisht nga gjërat, aq më tepër heq dorë nën presion. Nëse do kishte ndonjë presion do kishte ndodhur e kundërta.
Është rezultat jo i një situate, por i një momenti.
Nuk kemi një kontekst të madh para largimit, por një ngjarje, një ‘rrufe në qiell të hapur’, që kërkon reflektim që shkaktoi një impakt tek unë. Është një ngjarje e vetme, e papritur, e pallogaritur”. /tesheshi.com/
