Adriatik Llalla nuk është ndalur në akuzat ndaj ambasadorit amerikan në Tiranë, Donald Lu.
Në intervistën e dhënë për Blendi Fevziun në Opinion, Prokurori i Përgjithshëm akuzoi diplomatin amerikan se po hakmerrej ndaj tij ngaqë kishte pasur opinione të ndryshme për Reformën në Drejtësi.
Llalla tha gjithashtu se ka pasur ambasadorë që i kanë kërkuar arrestimin e disa politikanëve, por nuk ka bërë të ditur se kush janë ata.
Kreu i organit të akuzës ka shkuar edhe më tej kur ka thënë se edhe ambasadori i mëparshëm i SHBA, John Withers ka qenë i shqetësuar kur është hetuar pasuria e Edi Ramës.
Në intervistën për Opinion, Prokurori i Përgjithshëm ka deklaruar se ambasadori i SHBA nuk ka asnjë tagër që të bëjë presion ndaj sistemit të drejtësisë.
Llalla tha se “ambasadori i Lu i ka bërë këto deklarata pa praninë time, ai nuk është një guvernator i Shqipërisë, por një ambasador i një shteti”. Kryeprokurori theksoi se ai nuk mund të sillet si zot i vendit këtu.
Për herë të parë, kryediplomati amerikan tha publikisht me zë se kryeprokurori për më shumë se 18 muaj ka kundërshtuar reformimin e sistemit gjyqësor.
Kaq mjaftoi, që si rrallë herë, Llalla të sulmojë po publikisht Lu-në, duke thënë se ky sulm jo diplomatik- siç ai e cilësoi- vijon prej dy vitesh, dhe fsheh pas tij interesa personale të ambasadorit. /tesheshi.com/
