Liverpool dhe Totenham kanë luajtur një ndeshje të çmendur mes tyre, duke e mbyllur atë në barazim 2-2. Skuadra e Klopp e ka nisur me marsh të pestë takimin, duke shënuar që në minutat e para me egjiptianin Mohamed Salah.
Londinezët janë përpjekur të barazojnë në disa raste, e ndeshje është luajtur me ritëm të lartë e me raste në të dy portat. Në pjesën e dytë, një silur i mesfushorit Wynama, përfundon në trekëndëshin e portierit të Liverpool, Karius.
Pikërisht pas këtij momenti, Totenham dominon dhe gjyqtari jep një 11-metërsh 5 minuta nga fundi i ndeshjes. Harry Kane zgjedh të gjuajë në mes të portës, por portieri nuk është hedhur nga ndonjë krah dhe e grushtoi topin.
Pas shtesës prej 4 minutash, loja nuk u ngadalësua, e pikërisht në minutën e 92-të, Salah merr një top nga e djathta, e në pak metra katrorë, driblon 2 mbrojtës dhe shënon golin e dytë, duke e kaluar në “ekstazë” trajnerin Klopp që vrapoi gati 50 metra.
Pikërisht kur ndeshja po mbyllej, pas një krosimi në zonën e Liverpool, Lamela bën sikur goditet nga mbrojtësi dhe gjyqtari jep sërish penallti, duke zemëruar keqaz të kuqtë. Kane gjuan përsëri, e portieri hidhet në anën e kundërt të topit dhe 2 me 2. Gjyqtari mbyll ndeshjen e cila i pati të gjitha llojet e emocioneve brenda e u mbyll me duartrokitjen ironike të Jurgen Klopp.
Liverpool ruan vendin e tretë në renditje, 3 pikë larg Manchester United që renditet i dyti. Totenham ndodhet në vendin e pestë, 1 pikë larg Chelsea-t. /tesheshi.com/
