Lista Serbe startoi fushatën nga Graçanica duke iu çuar mesazh politikanëve kosovarë se do të pengojnë bërjen e ushtrisë. Sipas tyre, kjo është një çështje e pangociueshme për ta.
Ishte zv.kryeministri në detyrë, njëherit kandidati për deputet, Branimir Stojanoviq ka përsëritur qëndrimin kundër ushtrisë para simpatizantëve të partisë.
“Nesër ndoshta do të ndodhë që fëmijës tuaj, kushëririt, fqinjit dikush t’ia vesh uniformën e Ushtrisë së Kosovës që sikur duan ta formojnë, t’ia lënë në dorë pushkën dhe pastaj me pushkën tjetër ta detyrojnë të shkojë në veri të Kosovës ose diku tjetër. Detyrë jona është të themi jo, meqë gjatë tri vjetëve të shkuara nuk e kanë formuar ushtrinë fal nesh, e as që do ta formojnë”, ka thënë Stojanoviq.
Kurse kandidati tjetër për deputet, Srgjan Popoviq ka folur për mbrojtjen e interesave të popullit serb në Kosovë.
“Vetëm ne kemi mbështetjen e Beogradit dhe bashkë me Aleksandar Vuçiqin mund të luftojmë për të drejtat e plota të popullit tonë në Kosovë”, ka thënë Popoviq.
Të tubuarve u është drejtuar edhe kryetari i Graçanicës, Vlladeta Kostiqë, i cili ka thënë se kundërkandidatët e tyre janë të vetëdijshëm se Lista Serbe është e vetmja garanci për mbijetesën e serbëve në Kosovë.
Lista Serbe për pjesëmarrje në zgjedhjet e 11 qershorit ka paraqitur 20 kandidatë.
Kujtojmë se Ramush Haradinaj i nominuar për kryeministër nga PDK, AAK, NISMA ka premtuar se nëse vjen në qeveri, brenda 90 ditësh do të themelojë ushtrinë. /tesheshi.com/
