Nga Blendi Gashi
Mospjesëmarrja e Listës Serbe në seancën e sotme plenare, ka bërë që qeveria e Kosovës të tërheqë nga seanca sotme projektligjin për shënjimin e kufirit me Malin e Zi.
Tërheqjen e projektligjit e ka bërë kryeministri Isa Mustafa, i cili para parlamentarëve ka thënë se sot nuk janë rrethanat që duhet trajtohet ligji për Demarkacionin.
“Qeveria e tërheq sot nga rendi i ditës dhe procedura kuvendore. Do të mundohem të arrijmë një qëndrim të përbashkët sepse konsideroj që këtë ligj ka presione dhe një grup e kushtëzon këtë ligj nga një grup. Tërheqja nuk nënkupton që këtë ligj do ta rishqyrtojmë”, tha kryeministri Mustafa.
Por, ndaj tërheqjes së projektligjit kanë reaguar deputetët e opozitës duke thënë se arsyetimi i kryeministrit është i paarsyeshëm.
Opozita: arsyetimi i kryeministrit nuk qëndron
Deputeti i AAK-së, Daut Haradinaj, deklaroi se për të vënë në votim projektligjin në fjalë, nuk ka nevojë që gjithësesi të jetë pjesëmarrja e Listës Serbe, sepse sipas tij kjo nuk qëndron.
“Për ratifikimin e një marrëveshje s’ka nevojë për deputet të pakicës, sepse të gjithë deputetët janë të barabartë”, ka thënë Haradinaj.
Kurse Fatmir Limaj, nga NISMA për Kosovën, tha se sipas rregullores propozuesi mundet me tërheq projektligjin, por kjo është një çështje shumë e veçantë dhe arsyetimi nuk ishte real.
“Tërheqja e ligjit tërësisht e parasyetuar. Pse po tërhieqt ky ligj kur më shumë se një muaj qeveria tenton ta miratoi këtë ligj. Arsyeja se po e kushtëzon një grup, është një arsyetim i paqëndryeshëm, sepse Kuvendi s’mund ta kushtëzojë një grup parlamentar i minoriteteve. Por, nëse qeveria thotë se ky projektligj po e tërheqi se duhet të rishikohet nga fillimi, të përmirësohen gabimet, ose të vërtetohet variant aktual, pra ky propozim e ndihmo vendin dhe do të ndërtohej një konsensus i përbashkët. Me tërheq ligjin se Srpska nuk është këtu, por fakti është se nuk i keni votat për ta votuar Demarkacionin për variantin aktual”, ka thënë Limaj.
Ndërsa deputeti i Vetëvendosje-s, Glauk Konjufca, tha se për të ky projektligj nuk është votuar.
“Sot ra ligji, nuk u tërhoq por nuk kaloi. Për këtë falënderoi popullin, ekspertët, shokët e Vjosa Osmanit, shokët e Nait Hasanit dhe opozitën”, tha Konjufca.
Pas fjalës së Konjufcës, janë dëgjuar duartrokitje të deputetëve, ndërsa, edhe masa e protestuesve jashtë Kuvendit të Kosovës, janë gëzuar tej mase dhe kanë duartrokitur kur kanë kuptuar se Demarkacioni nuk po kalon. /tesheshi.com/
