Policia gjermane të shtunën ka njoftuar se ka liruar dy vëllezër të dyshuar për planifikimin e një sulmi në një nga qendrat më të mëdha tregtare të vendit, duke theksuar mungesën e provave.
Dy vëllezërit, të moshës 28 dhe 31-vjeçare dhe me origjinë nga Kosova, u arrestuan të premten, në kohën kur Gjermania ndodhet në gatishmëri të lartë pas një sulmi në një treg krishtlindjesh në Berlin në fillim të javës.
Por, policia në qytetin perëndimor Essen, tha në një deklaratë se pavarësisht hetimit të kujdesshëm nuk kanë mundur të gjejnë prova për akuzat kundër palëve.
Policia ka vepruar në bazë të informatave nga shërbimet e inteligjencës, që pretendonin se dyshja ishte duke planifikuar një sulm në qendrën Centro në qytetin e afërt të Oberhausen.
“Pasi është konstatuar se nuk ka pasur gjetje të rëndësishme penale kundër dy personave dhe nuk kishte asnjë rrezik konkret, ata u liruan nga paraburgimi policor këtë pasdite,” thuhet në deklaratë.
Arrestimi i vëllezërve bëri bujë në të gjithë botën, dhe erdhi vetëm katër ditë pasi 12 persona u vranë dhe dhjetra tjerë u plagosën, kur një person u vërsul me një kamion në një treg Krishtlindjesh në Berlin të mbushur me njerëz.
I dyshuari kryesor në këtë sulm, tuniziani Anis Amri, u vra në një shkëmbim zjarri me policinë në Itali, të premten. /tesheshi.com/
