Një vendim gjykate rrezikon të sjellë një krisje të paprecedentë në raportet shqiptaro-turke. Shkak është bërë vendimi për lirimin e shtetasit turk Mohamed Jasir Aigdoguz nga Gjykata e Durrësit, kapur ditë më parë në portin e Durrësit me pasaporte false.
Sipas autoriteteve të Ankarasë, ai është një i akuzuar për cenim të sigurisë kombëtare e terrorizëm, si pjesë e lëvizjes FETO, pra një pasues i Gylenit, dhe për këtë kishte dhe një dënim nga drejtësia turke.
Përfaqësia diplomatike e Ankarasë në Tiranë ka reaguar ashpër pas lirimit të tij, që duhet thënë se ka ardhur dhe si pasojë e një presion europian.
Siç dihet, disa vende perëndimore, armiqësore me qeverisjen e Erdoganit, janë vënë në mbrojtje elementëve të Gylenit, fill pas grushtit të dështuar të shtetit, korrikun e 2016-ës.
Në deklaratën e ashpër të ambasadës turke, theksohet se Aidognuz përbën një cenim dhe të sigurinë kombëtare në Shqipëri.
“Jemi të zhgënjyer nga dy “vendimet skandaloze” të Gjykatës së së Durrësit. Së pari Mohamed Jasir Aigdoguz dhe familja e tij janë arrestuar me pasaportë turke false në Durrës. Ata u përpoqën të kalonin në Itali duke përdorur dokumente të falsifikuara, është një krim që dënohet deri në 5 vjet burg, sipas nenit 189 të Kodit Penal Shqiptar.
E megjithatë më 11 tetor 2017 Gjykata e Durrësit vendosi të lironte Mohamed Jasir Aigdoguz për një shumë qesharake parash. Kështu vendimi i parë tregon se përdorimi i pasaportave false të cilat prodhohen nga një rrjet kriminal ndërkombëtar nuk ndalohen në praktikë dhe të huajtë që përdorin pasaporta false janë të lirë dhe të mirëpritur në Shqipëri.
Së dyti është e rëndësishme se Mohamed Jasir Aigdoguz akuzohet si anëtar i një organizate terroriste në Turqi e quajtur FETO. Ka një urdhërarrest turk për të. Kështu bazuar në Konventën Europiane të Ekstradimit ne kërkuam që autoritetet shqiptare të vendosin një masë sigurie prej 40 ditësh dhe ofruam të gjithë dokumentet e nevojshme.
Por sërish gjyqtari i Durrësit mohoi kërkesën për ekstradim me një vendim skandaloz të datës 13 tetor. Ne besojmë që kjo bie në kontradiktë me Konventën që Shqipëria dhe Turqia kanë për bashkëpunim bilateral në drejtësi. Gjithashtu është dhe një shembull i keq për luftën kundër terrorizmit.
I dyshuari për terrorizëm Mohamed Jasir Aigdoguz dhe avokati i tij u përpoqën të politizonin çështjen dhe gjyqtari ra shpejt në grackë.
Tani një i dyshuar për terrorizëm, që përdor pasaportë false, të cilën e ka siguruar nga një organizatë kriminale, është i lirë në Shqipëri.
Ne besojmë se kjo situatë cënon dhe sigurinë kombëtare në Shqipëri gjithashtu. Nëse të dyshuarit për terrorizëm që përdorin pasaporta false janë të lirë të lëvizin në territorin shqiptar, do të thotë që kërcënohet dhe siguria e shqiptarëve dhe e Shqipërisë.
Krijon mundësi që shumë të dyshuar për terrorizëm të veprojnë dhe bashkëpunojnë me rrjetet kriminale si dhe i inkurajon ata”, thuhet në deklaratën e ambasadës turke.
Rasti mund të sjellë një çarje në raportet shqiptaro-turke, të promovuara si ndër më të shkëlqyerat nga vite, në radhë të parë nga vetë kryeministri Rama. Ky i fundit i cili e ka shpallur Turqinë si partnerin nr.1 strategjik të Shqipërisë, që kur erdhi në pushtet në vitin 2013, nuk ka nguruar ta paraqesë veten si ndër liderët më të afërt në rajon me Erdoganin, por në rastin e direktivave për të ndërhyrë ndaj elementëve dhe strukturave Gylen në Shqipëri, është treguar tejet pasiv. Ndaj dhe lirimi i Aigdoguz, mund të sjellë një ftohje mes tyre. /tesheshi.com/
