Lirimi i ish-kreut të bandës së Durrësit, Lul Berisha nga gjykatat ka sjellë një reagim të ashpër të ministrit të Brendshëm, Saimir Tahiri. Vendimin e gjykatës së Durrësit, që u mor për Berishën tre ditë më parë, u cilësua nga ministri si këmbanë alarmi për të gjithë ata që sot mbajnë peng vetting-un.
“Ne na lind e domosdoshme, që të veprojmë shumë shpejt për të çuar përpara reformën në sistemin e drejtësisë dhe mbi të gjitha verifikimin nëpërmjet vetting-ut të çdo gjyqtari që për fat të keq e ka kthyer në traditë apo në rrugë konstante korruptimin si mjet për të bërë padrejtësinë e radhës. Unë shpresoj që kjo dhe shumë të tjera të shërbejnë si këmbanë alarmi për të gjithë ata që sot mbajnë peng vetting-un, instrumentin që do të pastrojë gjyqësorin nga të gjithë ata që janë majmur në karriget e gjyqësorit nëpërmjet korrupsionit”, u shpreh Tahiri, në ditën e 70-vjetorit të krijimit të Policisë Rrugore.
Po ashtu, ai njoftoi se nga 1 janari i vitit të ardhshëm hyn në fuqi sistemi që shpërblen shoferët e rregullt.
“Do kemi në fuqi sistemin, e cili do garantojë shpërblimin e atyre që respektojnë rregullat e qarkullimit rrugor dhe penalizimin e rëndë për ata që janë mësuar të shkelin Kodin Rrugor në mënyrë të vazhdueshme. Për ne ka qenë e papranueshme dhe besoj për qytetarët po kaq e papranueshme të dënohej në mënyrë të njëjtë qoftë ai që merrte një gjobë në vit, qoftë ai që gjobitej thuajse çdo javë”, tha ministri.
Ai shtoi se Shqipëria është ende një ndër vendet me një numër të lartë aksidentesh dhe pasojash të rënda në shëndetin dhe jetën e njeriut dhe kjo si pasojë e moszbatimit me rigorozitet të rregullave të qarkullimit./tesheshi.com/
