Lini (Linum usitatissimum) mbillet në vjeshtë në tokë të përgatitur mirë, korret në gusht dhe menjëherë mund të fillojë shtrydhja e tij për prodhimin e vajit, i cili ndahet në:
Vaji i linit industrial prodhohet me sistemin e nxehtë, sepse me këtë sistem rendimenti i përfitimit të vajit është më i madh e më i shpejtë.
Vaji i linit për ushqim dhe kurim shtrydhet me sistemin e ftohtë, në temperaturë maksimumi 37 gradë celsius, me makina speciale të ndërtuara posaçërisht për këtë qëllim.
Sistemi i ftohtë për prodhimin e vajit mjekues të farave të linit është i domosdoshëm, sepse vetëm kështu ruhen cilësitë e tij të mrekullueshme kurative.
Pas prodhimit të vajit të linit për qëllime mjekësore ose ushqyese, ai detyrimisht duhet ruajtur në frigorifer, në enë qelqi me ngjyrë të errët, sepse drita, ajri dhe temperaturat e larta shkatërrojnë të gjitha vetitë kurative të këtij vaji.
Kjo është edhe arsyeja se përse vaji i linit për qëllime mjekësore prodhohet pak e nga pak, aq sa është nevoja e tregut, gjatë gjithë vitit. Nëse doni me të vërtet të shfrytëzoni të gjitha vetitë kurative të këtij vaji, sigurohuni që ai është prodhim i freskët dhe i ruajtur në frigorifer. Përndryshe, cilësitë e munguara mund të jenë me pasoja dramatike për shëndetin tuaj!
Mos blini kurrë më shumë sesa nevojat tuaja për një muaj. Kontrolloni me kujdes datën e prodhimit në etiketë. Nëse kanë kaluar tre muaj nga dita e prodhimit, ai nuk duhet përdorur më për qëllime kurative.
Doza e nevojshme, e mjaftueshme në çdo rast për të plotësuar nevojat ditore të organizmit për Omega-3, është 5-6 gram (dy lugë kafeje) vaj lini në 24 orë. Doza 8-10 gram (tre lugë kafeje) vaj lini në ditë përdoret vetëm në raste të veçantë, me këshillën e mjekut. Këto doza nuk është mirë të kalohen, sepse organizmi nuk ka asnjë përfitim nga një gjë e tillë. /tesheshi.com/
