Sharmi prej politikani të ri i kryeministrit danez, Lars Løkke Rasmussen nuk i ka mjaftuar atij të mbrohet nga vala e kritikave në shkallë ndërkombëtare pas vendimit të parlamentit që miratoi ligjin e ri që redukton në mënyrë drastike të drejtat e refugjatëve.
Amnesty International, Komisioni Europian, agjencia e OKB për refugjatët dhe Human Rights Watch janë disa mes organizmave që dënuan me ashpërsi masat e reja që u miratuan në Danimarkë, një shtet anëtar i BE-së për të mbajtur larg emigrantët, e ku përfshihet edhe një shtyrje trevjeçare për bashkimin familjar dhe ku u jepet leje policisë të konfiskojë sendet e tyre me vlerë.
Por, analistët thonë se kryeministri i Danimarkës, një person i qeshur në shumicën e rasteve, tashmë e ka seriozisht, ai beson se qeveria e tij e qendrës së djathtë thjesht po jep zgjidhje për një shqetësim të justifikueshëm të brendshëm në lidhje me ndikimin e dhjetëra mijë refugjatëve mbi integrimin social dhe sistemin e mirëqënies sociale. Ai e mbështet këtë bindje tek fakti, që sipas tij, shumica dërrmuese e deputetëve të parlamentit dhe votuesve bien dakord me masat e propozuara nga qeveria.
Rreth 70 për qind e danezëve thonë se emigracioni përbën shqetësimin e tyre më të madh politik e sondazhet vazhdimisht tregojnë se pjesa më e madhe e njerëzve mbështesin paketën, thotë
Peter Nedergaard, profesor i shkencave politike në universitetin e Kopenhagenit. “Të gjitha partitë kryesore, përfshirë socialdemokratët, janë në dakordësi me masat”, thotë ai. Duket se danezët kanë një mendim të ndryshëm nga ai i pjesës tjetër të botës.
Rasmussen drejton një qeveri të formua vetëm nga partia e tij Venstre, pavarësisht se humbi vota dhe u rendit e treta pas socialdemokratëve që humbën pushtetin nga ngritja e partisë Popullore Daneze, një forcë populiste e anti emigrantëve që mori 21 për qind rë votave.
Euroskeptikët e krahut të djathtë qëndruan jashtë qeverisë për shkak se donin një referendum për largimin e Danimarkës nga BE, por në vend të kësaj “tregtuan” mbështetjen e tyre ndaj qeverisë së re me koncesione të tilla, si ato për rregulla më të ashpra ndaj refugjatëve.
Rasmussen ndëmorri një bast të guximshëm, duke zgjedhur të qeverisë edhe pse ka vetëm 34 vota të garantuara në parlament. Por, nga shtatori ai ka fituar një mbështetje të shumicës me anë të një serie masash të vijës së ashpër ndaj refugjatëve, ku përfshihet edhe reduktimi me deri në 50 për qind i përfitimeve për të sapoardhurit, refugjatë lufte nga Siria.
Shtatorin e kaluar, qeveria publikoi reklama në gazetat e Lindjes së Mesme, ku paralajmëronte se rregullat për refugjatët në Danimarkë janë shtrënguar dhe se azilkërkuesit që nuk plotësojnë kushtet, do të ktheheshin menjëherë. Në dhjetor, Rasmussen shkaktoi kundërshti të reja ndërsa deklaroi se duhej rishikuar konventa për refugjatët e vitit 1951.
Nëse fluksi i refugjatëve që hyjnë në Europë do të vijojë apo do të përkeqësohet, sipas tij, “do na duhet të shkojmë në pikën që të flasim, – Danimarka nuk mund ta bëjë këtë e vetme- për ndryshimin e rregullave të lojës”.
Por, me gati 23 mijë refugjatë që hynë në Danimarkë gjatë vitit 2015, dhe po kaq priten edhe këtë vit, analistët thonë se votimi i masave në parlament nuk duhet parë vetëm si rezultat i presionit nga e djathta ekstreme, por edhe nga vetë danezët që kërkojnë rregulla të njëjta si për refugjatët ashtu edhe për qytetarët vendas. Sipas analistëve, qytetarët duan të njëjtën qasje që bëhet për danezët e papunë, mbi të cilët aplikohen pothuajse të njëjtat rregulla për përfituesit danezë të papunë të asistencës sociale.
Rasmussen, ish-ministër Financash dhe për një kohë të shkurtër edhe kryeministri më i ri i Danimarkës mes viteve 2009-11 kur zëvendësoi Anders Fogh Rasmussen, e përshkroi ligjin e refugjatëve si “më të keqkuptuarin në historinë e Danimarkës”. Ai hodhi poshtë kritikat e shtypit ndërkombëtar mes të cilave dhe një titull që e cilësonte Venstre-n, “partinë politike më budallaqe në të gjithë botën”.
Përgatiti: Juli Prifti – /tesheshi.com/
