Lideri i opozitës maqedonase, LSDM-së, Zoran Zaev, në një konferencë të jashtëzakonshme paralajmëroi largimin nga Kuvendi të deputetëve të kësaj partie si shenjë revolte për shkak të zvarritjes së vendimit të Gjykatës Kushtetuese për Ligjin për Prokurori Speciale.
“Të gjitha afatet janë shkelur, durimi i qytetarëve është drejt fundit. Gjykata Kushtetuese menjëherë duhet të prononcohet për Ligjin për Prokurorinë Speciale. Nuk mundet që kjo të zgjasë tetë muaj, kur dihet se mesatarisht këto procedura zgjasin nga 2-3 muaj. Kur janë në pyetje iniciativat e VMRO-së dhe BDI-së, Gjykata Kushtetuese madje vendos për 7 ditë. Për këtë arsye deputetët e LSDM-së, do të lëshojnë Kuvendin”, deklaroi Zoran Zaev.
Ndërkohë ai porositi partitë e koalicionit në pushtet BDI-VMRO që mos të gënjehen duke shpresuar se do të vazhdojnë me pushtetin e tyre deri në vitin 2018, kur edhe është termini i rregullt për mbajtjen e zgjedhjeve, meqë do të ketë zgjedhje të parakohshme parlamentare në vjeshtë të këtij viti, ku qytetarët do të dënojnë politikat kriminale të kësaj garniture.
“As mos të ëndërrojnë një gjë të tillë. Zgjedhjet duhet të mbahen në vjeshtë, duke u plotësuar kushtet për zgjedhje fer dhe demokratike. Nëse plotësohen kushtet, kolona njerëzish do të dalin në zgjedhje për ta rrëzuar VMRO-DPMNE-në nga pushteti. Pse po ikin nga zgjedhjet? Nëse janë të bindur se udhëheqin në anketa, mos të ikin nga zgjedhjet. VMRO-DPMNE e din se edhe në anketa qëndrojnë më dobët. BDI ende është në avantazh në krahasim me partitë e vogla, mirëpo kjo parti duhet të veprojë drejtpërdrejtë që situata të ndryshojë”, shtoi Zaev.
Ndërkohë nga partitë politike në pushtet sikur kanë ngrirë aktivitetet e tyre politike dhe nuk ka asnjë qëndrim se do të vazhdojnë koalicionin e përbashkët qeveritar deri në zgjedhjet e rregullta të vitit 2018, apo nuk përjashtohet mundësia që të shkojnë në zgjedhje të parakohshme parlamentare, si formë më e mirë për dalje nga kriza politike. /tesheshi.com/
