“Macron pas trazirave. Cili do të jetë hapi i tij i radhës?”, pyet gazeta franceze Liberation në faqen e saj të parë, ku portretizon presidentin francez hipur në një biçikletë me helmetë, nw variantin Charlie Hebdo.
Në skicën e gazetës, “qiramarrësi” i Elysee-s tenton me biçikletën e tij të ngjitet në automjetet e dëmtuara të lëna pas nga incidentet e dhunshme që shpërthyen në Francë pas vdekjes së 17-vjeçarit francezo-algjerian Nael nga zjarr policie.
Në këtë mënyrë Liberation komenton reagimin e Elysee, por edhe të opozitës pas trazirave të fundit në Paris dhe në qytete të tjera të mëdha të vendit, me koston e dëmeve totale që kapin afërsisht një miliard euro.
Me rastin e turneut të 110-të të Tour de France, i cili këtë vit zhvillohet nga e shtuna më 1 korrik dhe përfundon të dielën më 23 korrik, gazetës i lindi ideja të ndërthurte megaeventin sportiv me…kalvarin e Macron pas vrasjes gjakftohtë të 17-vjeçarit nga zjarri i policisë dhe ngjarjet e rënda që pasuan.
Trazirat janë për shkak të dështimit të politikës së emigracionit, sipas një sondazhi të Le Figaro.
Sondazhi i parë i kryer pas incidenteve të rënda jep tonin duke treguar se shumica e qytetarëve francezë besojnë se trazirat janë për shkak të dështimit të politikës së imigracionit të qeverisë së Parisit.
Sipas një sondazhi të kryer nga kompania kërkimore Odoxa-Backbone Consulting në emër të gazetës Le Figaro, shumica dërrmuese e francezëve (84%) dënojnë shpërthimin e dhunës pas vdekjes së adoleshentit Nael në Nanterre, sepse ai nuk u ndal gjatë kontrollit të trafikut.
Gjatë dhunës së natës që pasoi dhe zgjati gati një javë, imazhet e kaosit i kanë lënë qytetarët të ndihen të “zemëruar” (84%) dhe “të frikësuar” (66%).
Megjithatë, francezët, sipas gjetjeve të sondazhit, presin masa më të ashpra nga qeveria, veçanërisht në lidhje me emigracionin: 59% i bëjnë thirrje Macron-it që nga vjeshta të shtrëngojë politikën e imigracionit.
Dhe kjo sepse ai konsideron se episodet e dhunshme që përmbysën vendin janë për shkak të dështimit të politikës së emigracionit të Elysee”.
Në të njëjtën kohë, 71% e francezëve janë në favor të reduktimit të flukseve të imigracionit.
Në vitin 2021, emigrantët përbënin një të dhjetën e popullsisë së Francës, sipas të dhënave nga Zyra Kombëtare e Statistikave të vendit.
Më shumë se një e treta e 7 milionë emigrantëve që jetojnë në Francë, 36%, kanë marrë nënshtetësinë franceze.
Pothuajse gjysma e emigrantëve (47.5%) vijnë nga Afrika, ndërsa 33.1% nga Evropa dhe 13.6% nga Azia.
Vendet kryesore të origjinës së tyre janë Algjeria (12.7%), Maroku (12%), Portugalia (8.6%), Tunizia (4.5%), Italia (4.1%), Turqia (3.6%) dhe Spanja (3.5%).
Për momentin, qeveria franceze po përpiqet të miratojë një ligj të ri imigracioni që do të lehtësojë deportimin e të huajve të paligjshëm, veçanërisht të atyre që kryejnë krime, ndërkohë që do të sigurojë dokumente të ligjshme për emigrantët e paligjshëm që punojnë në sektorë ku ka mungesë të fuqisë punëtore.
Projektligji përkatës është kritikuar si nga e djathta franceze, e cila kërkon të ulë numrin e emigrantëve dhe nuk beson se masat janë mjaft kufizuese, edhe nga e majta, e cila e konsideron atë shumë të rreptë. /tesheshi.com/
