Zhvillim i ri në aferën e bujshme të vrasjes së një shqiptari në Ekuador, i cili besohet se ka qenë pjesë e një operacioni ndërkombëtar të udhëhequr nga DEA.
Ilir Hidri, i cili u vra javën e shkuar në markatën e qytetit Guayaquil, mësohet se nuk ka këtë identitet, por kishte falsifikuar dokumentet dhe përdorte një emër tjetër.
Operacioni, i publikuar nga tesheshi.com javën e shkuar, ka shkaktuar tërmet në Prokurorinë shqiptare, e cila ka nisur të lëvizëë gurët për të kërkuar identitetin e vërtetë të shqiptarit. Madje siç bën të ditur ABC News, duke iu referuar burimeve të prokurorisë, i është kërkuar zyrtarisht policisë nëse shqiptari i dyshuar për lidhje me narkotrafikun ishte pjesë e një infiltrimi nga agjencitë e mëdha botërore ligjzbatuese, ndër ta edhe DEA.
Por ky veprim i prokurorisë shqiptare ka shqetësuar mjaft partnerët ndërkombëtare, ndaj mësohet se një delegacion i ICITAP ka pasur një takim urgjent me ministrin e Brendshëm, Dritan Demiraj.
Përdorimi i emrit të DEA-s sidomos në deklarata shtypi, cilësohet si shkelje e rëndë e çdo marrëveshje dhe ligji ndërkombëtar.
DEA vepron në të gjitha vendet me anë të marrëveshjeve të posaçme me Ministritë e Jashtme të vendeve ku operon, të cilat natyrisht që komunikojnë me kanalet e Ministrive të Jashttme.
Dhe vetëm në rast operacionesh të përbashkëta, të cilat kryhen në bazë marrëveshjesh, atëherë specialistët e DEA-s punojnë me policitë përkatëse të vendeve.
Një informacion i dalë nga Prokuroria e Krimeve të Rënda, thekson se ky organ kërkon nga policia e shtetit informacione mbi shqiptarin e vrarë në Ekuador, Ilir Hidri.
Prokuroria ka kërkuar informacion zyrtar nga policia e shtetit për të kaluarën e shtetasit shqiptar, që është vrarë në vendin e Amerikës Latine.
Sipas akuzës, është kërkuar që të verifikohet nëse është i saktë identiteti i personit të publikuar në mediat ekuadoriane dhe nëse po, të verifikohet e kaluara e tij në Shqipëri dhe lidhjet e mundshme me personat këtu.
Ndërhyrja e Prokurorisë ka ndodhurr pikërisht pas publikimit të lajmit nga tesheshi.com.
Ilir Hidri mësohet se pas arrestimit në Spanjë, dyshohet se ka pranuar të bashkëpunojë me DEA-n amerikane, e cila në bashkëpunim me autoritetet spanjolle po heton një rrjet të fuqishëm të kokainës nga Ekuadori në Spanjë dhe më pas në Europë.
Ky është edhe shkaku që dyshohet se është ekzekutuar, për shkak të bashkëpunimit të tij me DEA-n dhe autoritet e policisë spanjolle. Por burimet nga prokuroria, të cituara nga ABC News, theksojnë nuk ka ndonjë të dhënë konkrete për të kaluarën e Ilir Hidrit në Shqipëri, edhe pse rezulton që është banor i zonës së Vorës.
Nga ana tjetër, mësohet se Ministria e Jashtme me ndihmën e ambasadës shqiptare që mbulon zonën e Amerikës Latine, ka kërkuar informacion te autoritetet ekuadoriane për rastin e vrasjes së të riut shqiptar.
Kjo është në fakt një procedurë rutinë dhe detyrimë e çdo autoriteti konsullor.
Por absurdi qëndron në faktin se prokuroria shqiptare, në 25 vjet veprimtari nuk ka krijuar ende një dosje të plotë dhe të hollësishme për asnjë grup mafioz shqiptar të trafikut të drogës.
Gjatë gjithë këto vite, për baronët e tmerrshëm ka pasur vetëm dosje të shkëputura për krime të veçanta, siç është për shembull një vrasje apo një trafikim lëndësh narkotike.
E vetmja dosje e tillë që është grupi kriminal i Lulzim Berishës apo siç quhet banda e Durrësit, ku për herë të parë u përdor aseti i dëshmitarit të drejtësisë, por edhe këtu banda u nda në katër koka, duke e fragmentarizuar.
Aktualisht nuk ka një histori të plotë dhe të dokumentuar nga fillimi deri në fund të funksionimit dhe pasurive të bandave shqiptare të drogës.
Në Itali, Giovani Falcone me seksionin e posaçëm antimaffie në Prokurorinë e Palermos, kanë hartuar dosje të plota dhe të hollësishme për të gjithë veprimtarinë e grupeve të veçanta të Cosa Nostra-s.
Aq të plota kanë qenë këto, sa siç ka deklaruar shkrimtari i njohur italian Stefano Rulli, skenaristi i “La Piovra”s së bujshme: “Unë thjesht shkurtova një roman të Tolstoit në një novelë të Alberto Moravisë, pasi çdo gjë ishte shkruar me aq mjeshtëri nga Falcone, Borselino dhe shokët e tij prokurorë, të cilët punuan me aq pasion me ne publiçistët sa çdo gjë e kishim të lehtë”.
Marrëdhëniet e organit qëndror të akuzës me agjencitë amerikane ligjzbatuese duhet thënë se janë në nivelin më të dobët, që kur Prokurori i Përgjithshëm, Adriatik Llalla u ndalua që të vizitonte Shtetet e Bashkuara të Amerikës, së bashku me një grup të rëndësishëm prokurorësh.
Llalla, pas ndalimit të vizës, akuzoi ambasadorin amerikan Donald Lu se veprimi ndaj tij ishte një hakmarrje ndaj kërkesës së bërë nga diplomati i SHBA për të ndërprerë hetimet ndaj kompanisë Bankers Petroleum.
Prokurori i Përgjithshëm mori përkrahje edhe nga Ilir Meta, i cili e cilësoi qëndrimin e Llallës korrekt, ndërsa më pas në Top Story dha një intervistë të bujshme ku deklaroi se “nuk do të ketë tre procese vettingu(d.mth një nga SHBA, një nga BE dhe një nga Shqipëria) por vetëm një proces vettingu.
Prej asaj kohe vendi hyri në krizë, e cila u zgjidh me paktin Rama-Basha, të mbikqyrur nga amerikanët.
Por duket se pikërisht me të gjithë këtë proces, pra me reformën në drejtësi dhe vettingun kanë lidhje operacionet e DEA-s për të plotësuar dosjen shqiptare të drogës.
Meqë ra fjala, pse është harruar fare Klement Balili?! /tesheshi.com/
