Shtetet e Bashkuara po mbyllin ambasadën amerikane në Kiev dhe po “zhvendosin përkohësisht” një numër të vogël të stafit diplomatik të vendit në Lviv, një qytet në Ukrainën perëndimore, “për shkak të përshpejtimit dramatik të forcave ruse”, tha Sekretari i Shtetit Antony Blinken.
“Kam urdhëruar këto masa për një arsye – sigurinë e stafit tonë – dhe ne u bëjmë thirrje me forcë të gjithë qytetarëve të mbetur të SHBA në Ukrainë që të largohen menjëherë nga vendi,” tha Blinken në një deklaratë.
“Këto masa paraprake të kujdesshme nuk minojnë në asnjë mënyrë mbështetjen tonë ose angazhimin tonë ndaj Ukrainës. Përkushtimi ynë ndaj sovranitetit dhe integritetit territorial të Ukrainës është i palëkundur.
Ne po vazhdojmë gjithashtu përpjekjet tona të sinqerta për të arritur një zgjidhje diplomatike dhe për të qëndruar të angazhuar me qeverinë ruse pas ftesës së Presidentit Biden drejtuar Presidentit Putin dhe diskutimeve të mia me ministrin e Jashtëm Lavrov”, citohet të ketë thënë Blinken nga CNN.
Ai ka theksuar se stafi do të kthehet në ambasadë kur të plotësohen kushtet.
“Rruga drejt diplomacisë mbetet e disponueshme nëse Rusia vendos të angazhohet me mirëbesim. Ne mezi presim të kthejmë stafin tonë në ambasadë sapo të lejojnë kushtet,” shtoi Blinken.
Lëvizjet erdhën disa ditë pasi SHBA urdhëroi një shumicë të madhe të zyrtarëve të qeverisë amerikane të largoheshin nga vendi dhe njoftuan se shërbimet konsullore në ambasadën e SHBA do të pezulloheshin nga e diela.
Departamenti i Shtetit tha këtë fundjavë se do të mbajë një prani të vogël konsullore në Lviv për shërbimet e urgjencës.
Zyrtarët amerikanë u kanë bërë vazhdimisht thirrje qytetarëve amerikanë që të largohen menjëherë nga Ukraina, duke paralajmëruar se pushtimi rus do të vijë në çdo moment, përfshirë këtë javë. /tesheshi.com/
