Së fundmi arkeologu Gabriel Zuchtriegel ka postuar në rrjetin social X një letër që ka marrë së bashku me disa copa guri. Letra anonime ishte një kërkimfalje nga një person që mori gurë nga rrënojat e qytetit romak të Pompeit, por më vonë ndryshoi mendje dhe vendosi t’i kthente.
“Kam dëgjuar për ‘Mallkimi i Pompeit’. Nuk e dija se nuk duhej të merrja asnjë gur,” fillon letrën personi që kërkon falje, grua, duke përshkruar historinë e saj të fatit të keq pasi mori diçka nga Pompei. “Brenda një viti mora kancerin e gjirit. Jam një grua e re dhe e shëndetshme dhe mjekët më thanë se ishte thjesht ‘fat i keq’. Ju lutemi pranoni faljen time dhe këto pjesë. Më falni“, thuhet në letër.
Arkeologu ka konfirmuar në postimin e tij në rrjetet sociale se gurët janë kthyer në Pompei. Ai i ka uruar edhe personit që ka shkruar mesazhin “fat në të ardhmen”.
Ky nuk është një rast i izoluar i një viktime të gjoja “Mallkimi i Pompeit”, pasi njerëz të tjerë kanë kthyer gjithashtu artefakte që morën nga rrënojat e qytetit duke pretenduar se fatkeqësia i ka ndjekur që atëherë.
The Guardian raporton për një grua kanadeze të quajtur Nicole, e cila dërgoi pllaka mozaiku që ajo mori gjatë një vizite në Pompei në vitin 2005. Në mesazhin e saj, ajo tha se ato “sjellin fat të keq”, duke shpjeguar se që atëherë ajo është diagnostikuar dy herë me kancer gjiri dhe ka pasur “probleme financiare”. Një çift tjetër kanadez që mori diçka gjithashtu ia ktheu sendet Pompeit me një letër që kërkonte falje.
“Ne i morëm, duke mos menduar për vuajtjet dhe mundimet e atyre shpirtrave fatkeq gjatë shpërthimit të Vezuvit dhe vdekjes së tyre të tmerrshme”, shkruanin ata në letrën e tyre.
“Na vjen keq, ju lutemi na falni që morëm atë vendim të tmerrshëm. Shpirtrat e tyre u prefshin në paqe.”
Me kalimin e viteve, shumë njerëz i kanë kthyer reliket e vjedhura me mesazhe rrëfimi, por jo të gjithë e kthejnë atë që kanë marrë, pasi disa pjesë të Pompeit përfundojnë në eBay. Pavarësisht nëse ka një mallkim apo jo, kjo lloj bestytnie po bën dobi, pasi përndryshe shumë vende historike do të ishin grabitur shumë kohë më parë. Pompei vizitohet çdo vit nga mbi 2.5 milionë vizitorë dhe nëse edhe një pjesë e vogël aty do të merrej për suvenir, shpejt nuk do të kishte mbetur pothuajse asgjë, komentojnë kështu disa media që kanë dhënë lajmin. /tesheshi.com/
