Krimi i ndodhur sot në Tiranë, ku një 53-vjeçar qëlloi dy herë me armë zjarri mbi ish-bashkëshorten e tij, me profesionin gjyqtare, duket se nuk është një çështje e panjohur për institucionet e shtetit. Konflikti mes çiftit kishte të paktën dy vjet që dihej, ndërsa në 2015 policia arrestoi në kushtet e flagrancës autorin e krimit të sotëm.
Gjyqtarja Fildes Hafizi kishte paralajmëruar ngjarjen, kishte kërkuar ndihmë nga institucionet e shtetit, pasi ish-bashkëshorti i saj, Fadil Kasëmi, do e vriste.
Sikundër rrodhën ngjarjet, shteti dhe institucionet e tij nuk arritën të mbrojnë nënën e dy fëmijëve, e cila ndoshta jo për shkak të profesionit, por për faktin se e njihte personin, kishte treguar me gisht autorin e krimit.
Madje përmes një letre të publikuar pas vrasjes së gjyqtares, kuptohet se ajo kishte kërkuar ndihmë edhe nga Ambasadori amerikan në Tiranë. Letra duhet t´i jetë dërguar diplomatit amerikan 1 vit më parë, ku ajo tregon qartazi problemin që ka, por edhe faktin se shqetësimet e saj nuk janë marrë parasysh nga krerët e drejtësisë.
“Nuk kam më se kujt t’i drejtohem. Ju siguroj që shqetësimin tim e kam ndarë me krerët më të lartë të sistemit të drejtësisë, sigurisht duke u kujdesur gjithmonë që të mos influencoj në dhënien e drejtësisë, por mesa duket veshët janë të shurdhër. Për të ndarë këtë shqetësim timin do ju isha mirënjohëse nëse do më kushtonit disa minuta nga koha juaj”, thuhet ndër të tjera në letrën e gjatë që viktima e sotme, i drejtonte Ambasadorit amerikan.
Pavarësisht se nuk përmend emra mbi krerët e drejtësisë ato nisin me Presidentin si Kryetar i KLD dhe vijojnë më tej me ministër të Drejtësisë, kryetarë gjykatash, anëtarë KLD etj etj. Praktikisht këto që quhen drejtues të sistemit të drejtësisë nuk arritën dot të mbrojnë një nga pjesëtarët e “familjes së madhe”, që mund të vijonte jetën e saj, pa ia patur borxh kujt.
Të paktën sot këto krerë apo drejtues duhet të ndjejnë pak peshën e fajit mbi supe; as më shumë e as më pak kanë konsumuar një krim, ndoshta jo nga ata që kap ligji, por që mund të mbetet thellë në ndërgjegje nëse kanë një të tillë. /gj.k/ /tesheshi.com/
