Politikanët dhe liderët botërorë nuk do të lejohen të mbajnë fjalime në 80-vjetorin e çlirimit të Aushvicit, njoftoi Piotr Czywinski, drejtor i Memorialit dhe Muzeut Aushvic-Birkenau, duke theksuar se do të flasin vetëm të mbijetuarit e kampit nazist.
“Nuk do të ketë fjalime politike”, tha Chywinski për Guardian. “Ne duam të fokusohemi tek të mbijetuarit e fundit që janë mes nesh dhe te historia e tyre, dhimbja, trauma e tyre dhe mënyra se si ata na ofrojnë disa detyrime të vështira morale për të tashmen”, shtoi ai.
Lidhur me pjesëmarrjen e kryeministrit izraelit Benjamin Netanyahu në ngjarje dhe rrezikun e arrestimit të tij nëse ai udhëton në Poloni për shkak të urdhër-arrestit të lëshuar kundër tij nga Gjykata Penale Ndërkombëtare, Czywinski foli për “raportime provokuese të medias”, duke thënë se ai nuk kishte asnjë tregues se Netanyahu kishte planifikuar të merrte pjesë në ngjarjen e këtij viti. Ai shtoi se në këtë ngjarje pritet një delegacion i madh izraelit.
Netanyahu aktualisht nuk planifikon të marrë pjesë në këtë ngjarje, tha një ndihmës i kryeministrit për gazetën izraelite Times of Israel.
Mediat polake raportuan muajin e kaluar se kryeministri izraelit Benjamin Netanyahu nuk do të udhëtojë në Poloni për të marrë pjesë në ngjarjet që shënojnë 80-vjetorin e çlirimit të kampit të përqendrimit të Aushvicit, nga frika se ai do të arrestohej për shkak të një urdhër-arresti të lëshuar kundër tij nga autoritetet polake Gjykata Ndërkombëtare Penale.
Ngjarja e madhe në Poloni është planifikuar të zhvillohet në Ditën Ndërkombëtare të Përkujtimit të Holokaustit më 27 janar dhe pritet të marrin pjesë dhjetëra liderë dhe krerë shtetesh, përfshirë mbretin Charles.
Gjykata Penale Ndërkombëtare ka lëshuar urdhër-arreste për Netanyahun, ish-ministrin izraelit të Mbrojtjes Yoav Galland, për krime lufte dhe krime kundër njerëzimit.
Javën e kaluar, presidenti polak Andrzej Duda i kërkoi qeverisë të sigurojë që Netanyahu të mund të zgjidhte të merrte pjesë në përvjetorin pa frikë se do të arrestohej në bazë të urdhër-arrestit të ICC-së kundër tij.
Të mërkurën, Bloomberg raportoi se Duda i kishte dërguar një letër kryeministrit Donald Tusk duke thënë se Polonia duhet të sigurojë që Netanyahu të mund të marrë pjesë “i papenguar” në ceremoninë e 27 janarit në Aushvic, duke pasur parasysh natyrën e jashtëzakonshme të ngjarjes. /tesheshi.com/
