“LETRA NGA POPULLI”/ Pse duhet t’i vijë turp Elhaida Danit

Më mahnit hipokrizia jonë si shqiptarë. Një hipokrizi që na buron në deje. Nuk e di nëse e kemi pasur ndër shekuj këtë “virtyt”, nëse na e shtoi diktatura apo nëse këto 20 vitet e fundit të tranzicionit kanë ndryshuar diçka në ADN-në tonë.

Ditët e fundit “turpi” i Elhaida Danit ka pushtuar të gjitha mediat, qofshin ato vizive apo të shkruara, qofshin rrjete sociale. Njerëzit janë mbledhur kundër saj. Politikanët, prezantuesit, gazetarët kanë marrë të gjithë statusin e kritikëve të artit dhe flasin për turpin e Elhaidës. Një këngëtare që dy vjet më parë fitoi çmimin si zëri më i mirë i Italisë, në krah të Rikardo Koçantes (Riçardo Coçiante), duke e bërë të gjithë Italinë të derdhte lot në interpretimin e këngës “Adaggio”. Një Elhaidë që, siç po përflasin shumica, duhet t’i vijë turp për prezantimin e saj në “Eurovision”, ku sipas “ekspertëve” të muzikës, nuk dha më të mirën.

Nuk dua të merrem fare me faktin nëse Elhaida këndoi mirë apo keq. Mendimin tim për këtë pjesë e kam ndarë me familjen dhe shoqërinë time. Por do ta marr të mirëqenë faktin se Elhaida Danit duhet “t’i vijë turp” që nuk këndoi mirë. Thjesht jam kurioze. Po sikur Elhaida Dani të kishte kënduar shkëlqyeshëm, a do ta kishte fituar Shqipëria Eurovisionin? Sigurisht që jo! Jemi të gjithë të vetëdijshëm për një gjë të tillë.

E vetmja gjë që ne si shqiptarë shpresojmë kur paraqitemi në këtë festival kënge, është që të arrijmë diku “nga vendet e para”. Jemi të gjithë të siguritë se edhe sikur kënga jonë të ishte e përkryer, këngëtarja e përkryer, sërish ne nuk do ta fitonim Eurovisionin.

Por çfarë më shqetëson personalisht? Unë, si një ndjekëse e debateve mediatike, ku për këngët flasin ata që s’kanë lidhje me këngët dhe futbollistët gjykohen për lojën nga shitësit e farave, më krijon mllef gjithë kjo hipokrizi. Jemi të vetëdijshëm se nuk do të fitojmë, i shohim të gjitha pisllëqet e bëra në “Eurovision” dhe sërish nuk ngurrojmë të kryqëzojmë këngëtaren tonë për “turpin” e saj (edhe pse u deklarua si një nga zërat më të mirë të këtij kompeticioni).

Ne, pikërisht ne që, kur flitet për Rita Orën, e quajmë shqiptare, por kur bëhet fjalë për ndonjë kriminel, nuk ngurrojmë t’i përgojojmë si shqiptarë të Kosovës. Ne hipokritët që pranojmë vetëm suksesin, megjithëse vetë nuk kemi sakrifikuar asgjë për atë sukses!

Ama, mendoj se Elhaida e ka një “turp” në këtë mes. E bëri këtë turp dy vjet më parë, kur pasi fitoi si zëri më i mirë i Italisë, vazhdoi të ishte krenare për të qenët shqiptare, për këta njerëz mosmirënjohës që të ngrenë në krahë dhe në momentin e parë që nuk arrin pritshmëritë e tyre të pabaza, të përplasin përtokë.

Është turp, Elhaida! Kthimi yt nga Italia është thjesht turp! Ndoshta duhet të kishe qëndruar atje, ashtu si Elsa Lila, ashtu si Ana Oxa, ashtu si shumë shqiptarë të tjerë që kanë vlera dhe që e lënë vendin e tyre. Të qëndroje atje ku mund t’i jepje vetes mundësinë që, megjithëse shqiptare, të të respektonin dhe të mos prisnin  rastin e parë për të të shkelur me këmbë.

Sepse fundja, sado ta duash një vend, kur e sheh që ajo që quhet “ajka” e saj është thjesht një thes me të pavlerë, atëherë është më mirë t’ia mbathësh vrapit. Në këtë mënyrë, “drita” dhe “dielli” yt nuk do të të verbojnë!

Nënshkruar nga M.S