Emancipimi, tepër i nevojshëm për një shoqëri, është kthyer në kryefjalë në ditët tona. Sidomos në Tiranë. Të duhet të jesh i emancipuar në familje, i emancipuar në shkollë, i emancipuar rrugës, i emancipuar në kafe, i emancipuar në punë.
E meqë duam të jemi shumë të emancipuar, kemi filluar që çdo gjë ta tregojmë hapur. Meqë jemi të emancipuar dhe mendjehapur, femrat dalin shpesh me mbathje rrugës, çdo gjë që bëjnë në shtëpi e postojnë në rrjetet sociale, djemtë sigurisht që çdo gjë e postojnë në “Facebook”, ndërsa videot intime (e ç’vlerë ka intimiteti fundja!!!) përfundojnë në “YouTube”.
Meqë jemi të emancipuar dhe mendjehapur, tani nëse je 15vjeç/e dhe ende i/e virgjër, quhesh i prapambetur. Meqë jemi të emancipuar dhe mendjehapur, nëse ke shkuar 18vjeç/e dhe s’ke kaluar 2-3 të dashur/a, je i papërvojë dhe duhet të të vijë turp.
Sepse meshkujt e emancipuar dhe mendjehapur nuk mund të pranojnë të marrin për grua një femër që është e virgjër, sepse ajo “ka diçka që nuk shkon”. Sigurisht, meqë prindërit janë të emancipuar dhe mendjehapur, nuk e kanë problem që vajzat apo djemtë e tyre, të kryejnë marrëdhënie seksuale në moshë të vogël (fundja kohët kanë ndryshuar), mjafton që të mos bëjnë “gjëmën” e të ngelen shtatzënë apo të lënë shtatzënë dikë tjetër.
Është i bukur emancipimi!
Ti bën çfarë dëshiron të bësh, pa marrë parasysh një moral, një etikë. Ti zhvishesh (se për t’u veshur është vështirë) dhe këtë gjë e bën “për vete”, megjithëse vështirë se do të zhvisheshe në atë lloj mënyre, me atë lloj krehjeje dhe lyerjeje nëse askush nuk do të të shihte.
Gjithsesi, rëndësi ka që ti je mendjehapur dhe i/e emancipuar. Emancipimi sigurisht që nënkupton një shoqëri të përparuar. Megjithatë, nënkupton një shoqëri me një bazë të shëndoshë morale. Njerëzit që vijnë nga vende më të zhvilluara se ne, habiten me emancipimin tonë.
Sepse në fakt, të jesh i emancipuar, do të thotë edhe të mbash nën kontroll instinktet. E nëse këtë nuk arrin ta realizosh, atëherë në vend të të qenit mendjehapur, ndoshta është më mirë të thuhet se jemi mendjeshqyer.
Nënshkruar nga A.D
