Kryeministri Haradinaj iu është drejtuar me një letër-propozim ambasadorëve në Prishtinë, por dhe aktorëve ndërkombëtarë, ku ju bën më dije kushtet e gjykuara prej tij, si një rrugë drejt heqjes së taksës doganore ndaj mallrave serbë, siç dhe ndërkombëtarët po e kërkojnë me ngulm.
Në fillim të letrë së tij, Haradinaj qartëson statusin që gëzon Kosova, për të dalë me pas te propozimet.
“Pas marrjes së vendimit të Gjykatës Ndërkombëtare të Drejtësisë (GJND-së) se shpallja e pavarësisë nga ana e Kosovës në vitin 2008 nuk ishte e paligjshme, Asambleja e Përgjithshme e OKB-së miratoi Rezolutën nr. 64/298 (2010), e cila njohu përmbajtjen e Opinionit të GJND-së dhe mirëpriti ‘gatishmërinë e Bashkimit Evropian për të lehtësuar procesin e dialogut ndërmjet palëve’. Ne kemi bindje të thelle që mund të arrihet në vitin 2019 një marrëveshje gjithëpërfshirëse dhe ligjërisht e detyrueshme ndërmjet Kosovës dhe Serbisë, e cila do t’i adresojë të gjitha çështjet e pazgjidhura, duke përfshirë reparacionet e luftës, të drejtat e minoriteteve në të dyja vendet, si dhe çështjet e ndryshme ekonomike, sociale dhe kulturore – duke shpjer në njohjen e ndërsjellë dhe anëtarësimin e Kosovës në Organizatën e Kombeve të Bashkuara”, shkruan Haradinaj. E më poshtë, ai qartëson arsyen se përse u ndërmorr masa e taksimit doganor.
“Më 21 nëntor 2018, Qeveria e Kosovës vendosi një taksë prej 100% (‘taksa’) mbi importin e mallrave me origjinë nga Serbia si dhe nga Bosnja dhe Hercegovina.
Taksa ka ardhur si përgjigje ndaj shkeljeve të vazhdueshme të Marrëveshjes për Tregti të Lirë me Evropën Qendrore (CEFTA) dhe akteve të vazhdueshme të agresionit që kanë për qëllim dëmtimin e shtetit të Kosovës”.
Haradinaj propozon një konferencë, të tipit “Rambuje”, ndonëse
nuk e artikulon, e cila do çonte në heqjen e taksës, por dhe shkaurjen drejt një
raporti të ri mes Serbisë dhe Kosovës.
“Qeveria
e Kosovës do të pezullojë menjëherë tarifën në rast se plotësohen rrethanat e
mëposhtme:
1.
Shtetet e Bashkuara të Amerikës (SHBA) dhe Bashkimi Evropian (BE), pas marrjes
së hapave praktik për inicimin dhe mbështetjen e një konference ndërkombëtare
(“Konferenca”) me qëllim të arritjes së një marrëveshje
gjithëpërfshirëse dhe ligjërisht të detyrueshme ndërmjet Kosovës dhe Serbisë
për zgjidhjen e të gjitha çështjeve të pazgjidhura ndërmjet dy vendeve –
konferenca duhet të fillojë sa më parë që është e mundur pas plotësimit të
rrethanave të përshkruara në paragrafët 2 deri në 5 më
poshtë dhe duhet të përfundojë brenda 14 ditëve:
2.
SHBA-të dhe BE-ja do të japin zotime publike dhe do të garantojnë që në
Konferencë nuk do të ketë:
(i)
Çfarëdo rivendosje të kufijve ekzistues të Kosovës, ose ndarje të Kosovës, ose
shkëmbime territoriale të çfarëdo natyre.
(ii) Dhënie të kompetencave ekzekutive të çfarëdo forme për asociacionin e
komunave serbe në Kosovë ose ndonjë marrëveshje tjetër që është në kundërshtim
me Kushtetutën e Kosovës.
(iii) Masa të çfarëdo natyre të bazuar në koncesione që shkojnë para datës 17
shkurt 2008.
3. BE-ja
do të jep zotime shtesë publike dhe do të garanton se:
(i) Do të hyj në fuqi liberalizimi i vizave për qytetarët e Republikës së
Kosovës para fillimit të Konferencës.
(ii) Do të zbatohet dhe do të jetë plotësisht funksionale Marrëveshja për
Energji e arritur në Bruksel ndërmjet Kosovës dhe Serbisë para fillimit të
Konferencës
4. Është
verifikuar se Serbia ka larguar të gjitha barrierat jo-tarifore të shkaktuara
ndaj lëvizjes së mallrave nga Kosova, si dhe të gjitha kufizimeve të paligjshme
në tregtinë e shërbimeve dhe lëvizjen e njerëzve nga Kosova në Serbi.
5.
Presidenti, Kryeministri ose Ministri i Punëve të Jashtme të Serbisë
konfirmojnë publikisht se janë ndaluar në mënyrë permanente të gjitha politikat
dhe veprimet e çfarëdo lloji të drejtuara kundër aspiratave të
Kosovës si shtet sovran qoftë nëse ato aplikohen në nivel lokal, rajonal apo
ndërkombëtar.
Tarifa do
të ri-vendoset menjëherë nëse Konferenca nuk përfundon me një
marrëveshje gjithëpërfshirëse të detyrueshme mes Kosovës dhe Serbisë, e cila
siguron, ndër të tjera, njohjen reciproke dhe anëtarësimin e Kosovës në
Organizatën e Kombeve të Bashkuara. Tarifa do të ri-vendoset në një datë të
mëvonshme nëse nuk arrihet të zbatohet marrëveshja gjithëpërfshirëse e detyrueshme
e arritur në Konferencë”, përfundon letër-propozimi i Haradinajt.
Tashmë mbetet të shihet se cili do jetë reagimi i faktorit ndërkombëtar ndaj këtyre propozimeve. /tesheshi.com/
