Presidenti i Francës, Emmanuel Macron dhe kancelari i Gjermanisë, Olaf Scholz, i kanë dërguar një letër të përbashkët presidentit të Serbisë, Aleksandar Vuçiç, në të cilën i bëjnë thirrje që të tregojë “vendosmërinë dhe gatishmërinë maksimale” për të marrë vendime të vështiram të cilat çojnë në progres në dialogun ndërmjet Kosovës dhe Serbisë, nën patronazhin e Bashkimit Evropian.
“Tensionet e fundit kanë treguar se hapa konstruktivë përpara nevojiten urgjentisht, si në planin praktik ashtu edhe në atë politik. Prandaj, ne i caktuam këshilltarët tanë për politikën e jashtme dhe të sigurisë… t’i ofrojnë mbështetje të drejtpërdrejtë (të dërguarit të posaçëm të BE-së për dialogun Kosovë-Serbi) Miroslav Lajçak në përpjekjet e tij. Ne sugjerojmë që këshilltarët tanë, së bashku me Lajçakun, të vizitojnë Kosovën dhe Serbinë, për të shqyrtuar mundësitë për të çuar shpejt procesin përpara”, kanë thënë Scholz dhe Macron në letrën e tyre drejtuar Vuçiçit.
Ata shtojnë se letrën e përbashkët e kanë dërguar “në një moment me rëndësi vendimtare për sigurinë në kontinentin evropian dhe stabilitetin në rajonin e Ballkanit Perëndimor”.
“Ne jemi të bindur se, në dritën e agresionit rus kundër Ukrainës, ne duhet të bëjmë përpjekje edhe më të forta për ta bërë realitet perspektivën evropiane të vendeve të Ballkanit Perëndimor dhe për të zgjidhur mosmarrëveshjet afatgjata dypalëshe dhe rajonale. Normalizimi i plotë i marrëdhënieve ndërmjet Kosovës dhe Serbisë është thelbësor për Ballkanin Perëndimor”, kanë shkruar kancelari gjermane dhe presidenti francez.
“Ju drejtohemi juve si lider i vendit tuaj, për t’ju apeluar që të tregoni vendosmëri dhe gatishmëri maksimale për të marrë vendime të vështira, të cilat çojnë në përparim në dialogun ndërmjet Kosovës dhe Serbisë, nën patronazhin e BE-së”, thuhet në letër.
Edhe pse nuk përmendet konkretisht, ajo që mund të lexohet mes rreshtave të letrës është mesazhi europian dërguar Beogradit, Vuçiçit konkretisht, për të marrë në shqyrtim një njohje të mundshme të pavarësisë së Kosovës. /tesheshi.com/
