Deputeti demokrat Genc Ruli i ka dërguar një letër kryetarit të Partisë Demokratike Lulzim Basha ku i kërkon që të mos e kandidojë në listat e deputetëve të zgjedhjeve që mbahen më 25 qershor.
Ruli, ka bërë kështu tërheqjen e tij vullnetare nga PD-ja dhe politika për të mos u përballur me ndonjë përjashtim nga ana vetë Basha në listat e reja që po përpilohen në zyrat e selisë blu.
Ruli është një dnër emrat e parë që iu bashkua PD-së në ditët e themelimit të saj në vitin 1991 së bashku me mikun dhe të afërmin e tij, Gramoz Pashko. Po ashtu si Pashko ai u largua si “armik’ i Berishës për t’u rikthyer pranë kësaj partie në vitin 2005 me ftesë të Sali Berishës. Ruli ka mbajtur postin e Ministrit të Financave gjatë qeverisjes së Berishës që pas rikthimit të tij në PD.
Gjatë çadrës së protestës së opozitës ai zgjodhi të mos ishte aktiv duke përgatitur si duket tërheqjen finale. Letra nuk është bërë akoma publike, por vetë deputeti ka pranuar për mediat ekzistencën e saj duke u shprehur se i ka kërkuar Bashës të mos e kandidojë për deputet./tesheshi.com/
