Skuadra surprizë jo vetëm në Angli, por në tërë Europën, ka barazuar sot 1-1 në “Old Trafford” ndaj Mançester Junajtedit. Pika e marrë nuk e lejon të festojë, por e afron sidoqoftë më tepër Lestër Sitin me objektivin e pamenduar ndonjëherë: të fitojë Premier Ligën!
Mision i pamundur ngjan tani për Totenhemin fitimi i kampionatit anglez. Skuadra londineze duhet t’i fitojë të tre ndeshjet e mbetura që të shpresojë në ndonjë gabim të Lestër Sitit. Edhe barazimi mbrëmjen e së hënës ndaj Çelsit në “Stamford Bridge” është i barabartë me dorëzim pa kushte!
Lestërit iu desh të përballojë një Mançester në sulm në minutat e para të takimit të sotëm. Martial shënon që në minutën e tetë për vendasit. Një epërsi që nuk shijohet gjatë, teksa Morgan barazon nëntë minuta më pas. Rezultati 1-1 nuk do të ndryshonte më, edhe atëherë kur udhëtuesit e Lestërit mbetën me një lojtar më pak pas daljes me të kuqe të Drinkwater-it.
Ja ç’deklaroi trajneri i Lestërit, Claudio Ranieri, pas ndeshjes: “Nuk erdhëm këtu për të fituar titullin… e dinim se ishte një ndeshje e vështirë. Junajtedi ishte më mirë se ne fillim të lojës… Ne shënuam në momentin e duhur, dhe atëherë fituam më tepër vetëbesim. Jam shumë i kënaqur. Jam shumë i kënaqur kur i shoh lojtarët e mi të luajnë si sot.”
Çështja e titullit mund të zgjidhet në orët e vona të së hënës, ose, përndryshe, në fund të javës tjetër, për Lestërin. Ndërsa Mançester Junajtedi duket ta ketë shumë të vështirë të përfundojë në katër vendet e para pas barazimit të sotëm. /tesheshi.com/
