Geri Lineker, një ish-lojtar i Lestërit e një prej ish-lojtarëve më të mirë anglezë, e ka përshkruar mundësinë e fitimit të trofeut të kampionatit nga Lestëri si “triumfin më të pamundur”, por ja që e pamundura dalëngadalë po kthehet në të mundur.
Lestër Siti fitoi mbrëmë 1-0 ndaj Njukasëllit, me golin e shënuar nga Okazaki në minutën e 25-të. Qe një ndeshje ku italiani Ranieri rreshtoi për herë të dhjetë në këtë sezon një formacion të pandryshuar. Një ndeshje ku vendasit fituan me të vetmin top të dërguar brenda kuadratit të portës kundërshtare.
Nuk qe vërtet një paraqitje e mirë e Lestërit, por të rëndësishme janë tre pikët e siguruara. Me to, Lestëri ka tani kundërshtar të vetëm Totenhemin, që gjendet pesë pikë pas në renditje. Arsenali i vendit të tretë dhe Man. Siti i vendit të katërt kanë përkatësisht 11 dhe 12 pikë më pak se Lestëri, por edhe nga një ndeshje më pak.
Kjo qe e 12-ta sfidë e fituar nga Lestëri me një gol të vetëm këtë sezon, duke lënë pas çdo skuadër tjetër të Premier League-s.
Ranieri e pranoi pas takimit se nuk kishte qenë një paraqitje e mirë, por e çmoi shpirtin e skuadrës: “Nuk ishte paraqitja më e mirë nga ne, por treguam shpirt fantastik.”
Lestëri do të luajë të shtunën në fushën kundërshtare të Kristëll Pallasit, me synimin për të fituar një prej tetë ndeshjeve të mbetura gjer në fund të kampionatit.
“E ndjej tani se jam i përqendruar vetëm në takimin e ardhshëm kundër Kristëll Pallasit. Jemi aq të fortë sa të mendojmë vetëm për një ndeshje. Hap pas hapi, kjo është filozofia jonë,” deklaroi trajneri i Lestërit pas ndeshjes. /tesheshi.com/
